لیکوال: سلمان باور
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د افغانستان پۀ اړه د پاکستاني لورې دا څووم چارواکی دی، چې بې بنسټه څرګندونې کوي؛ د هغوی لۀ جملې د پاکستان د بهرنیو چارو وزارت استازي اصف دُراني تازه پۀ یوه مرکه کې د افغانستان پۀ اړه لۀ حقیقته لرې خبرې کړې دي.
لۀ اصف دُراني خبریال پوښتنه کوي: افغانستان کې د پاکستان په وړاندې ښکاره کینه لیدل کېږي، تاسو پکې څه وایئ؟
دُرانی: که دوی کینه کوي، نو ولې خوښوي چې دلته راشي، زه په دې باره کې لږ خو د تحریک طالبان پاکستان په تړاو ډېر اندېښمن یم، (که مونږ نن پولې خلاصې کړو، تقریباً ټول افغانستان به راشي،) دوی دا خوښوي چې دلته راشي.
(منقول)
پاکستان ته د افغانانو ورتلل هغه وخت د الهي فریضې پۀ بناء وو او هلته د افغانانو ډېره مېشت کېدنه د دې لامل شوه چې ډېری افغانانو پۀ پاکستان کې خپلوۍ وکړې، که د خپلوانو کره تلل راتلل پۀ دې تعبیروي چې ګوندې ټول افغانان پاکستان ته تلل غواړي، غلط شوی دی، دا ځکه چې هره ورځ د تورخم او سپین بولدک لۀ لارې لسګونه کورنۍ هېواد ته راستنیږي، عِلت دا دی چې افغانان لۀ کومې ستونزې هجرت کولو ته مجبور شوي وۀ هغه لۀ منځه تللې ده، ځکه بیرته خپل هېواد ته راستنېږي.
اوس پوښتنه دا ده، چې پۀ بندو پولو بیا څنګه TTP پاکستان ته ور اوښتلی شي!؟ دا خبره ښکاره دلیل دی چې TTP پۀ پاکستان کې ده، نۀ پۀ افغانستان کې؛ دُرانی بیرته پۀ خپلو خبرو رد کوي.
خبریال: آيا طالبانو په خپلو تېرو دریو کلونو کې څه ډیپلوماټيکې لاسته راوړنې لري؟
دُرانی: مونږ افغانستان کې سولې راتلو ته هرکلی وایو، خو د دوی سوله زمونږ لپاره ستونزه شوه.
دا څرګندونې نوموړی داسې مهال کوي، چې د افغان دفاع وزارت لۀ لورې څۀ موده وړاندې پۀ سرحداتو د سلو نویو پوستو او سړک جوړولو خبر ورکړل شو، چې چارې یې عملاً روانې دي؛ دُراني ته لۀ خپل هېواد او خاورې ساتنه ستونزه ښکاري.
دُرانی د خپلو خبرو پۀ جریان کې خپلې مغالطې هېروي خبریال ترې پوښتنه کوي: د طالبانو پۀ تېره واکمنۍ کې ډېره سختي کوله، ایا اوس او پخوا یې څه توپيرونه شته؟
دُرانی: (د امارت اوسنۍ واکمني تر پخوا ښه ده،) خو ستونزې لري، (خصوصاً د امنیت برخه کې).
تر پخوانۍ واکمنۍ چې اوسنۍ واکمني ښه یادوي، تېر امارت د درې هېوادونو لۀ لورې پۀ رسمیت پېژندل شوی و، چې یو پکې د پاکستان هېواد و، نو نن ولې د پخوا څخه د ښۀ امارت پر خلاف بېځایه څرګندونې کېږي!؟
لۀ دې ښکاري چې دا خبرې د دوی د چارواکو لۀ لورې د دې لپاره کېږي، چې خپل ولس ته پۀ سترګو کې خاورې وروشیندي.
ورپسې د امنیت یادؤنه کوي پۀ داسې حال کې چې تېره جولای میاشت پۀ افغانستان کې هیڅ امنیتي پېښه نۀده ترسره شوې او پۀ پاکستان کې پۀ تېره جولای میاشت کې ۷۹ بریدونه شوي دي چې د ټولو بریدونو پۀ مخنیوي کې پاکستانی حکومت پاتې راغلی دی.
د امنیت د نشتوالي خبره د چا پۀ حق کې صدق کوي!؟
دوی ته پکار دا ده چې د نورو هېوادو پۀ چارو کې د لاسوهنې پر ځای پۀ خپل اداري سیستم کې ژور بدلون او داسې خلک چې د خپل هېواد د امنیت د ساتلو پر ځای د نورو هېوادونو امنیت ته خپګان کوي پۀ کور کېنوي.
