اوکراین: “اودیوکا” ښار له سقوط سره مخ دی

د نړۍوالو رسنیو د راپورونو پر اساس امريکا خبرداری ورکړی، چې ښايي روسيه د اوکراین په ختيځ کې د “اودیوکا” مهم ښار سقوط کړي.په راپورونو کې ویل شوي، چې په دې وروستيو مياشتو کې دلته د روسي او اوکرایني ځواکونو تر منځ سختې نښتې شوې دي.په راپورونو کې زیاته شوې، چې روسي ځواکونو په اوديوکا کې پرمختګ کړی او د دغه ښار د کلابندۍ وېره شته ده.د امريکا د ملي امنيت شورا وياند جان کربي په اوکرايين کې د وسلو او مهماتو کمښت ته په اشارې ويلي، “اوديوکا د روسيې منګولو ته د لوېدو له ګواښ سره مخامخ دی”.نوموړي د پنجشنبې په ورځ واشنګټن کې يوې غونډې ته وويل، چې ښايي اوديوکا سقوط وکړي؛ ځکه، چې “د اوکرایني ځواکونو جنګي وسایل او مهمات د خمتېدو په حال کې دي”اوکرايين، چې خورا لوی پوځي ځواک لري په پراخه کچه د امریکا او نورو لوېديځو هېوادونو پر وسلو او مهماتو تکيه کوي، څو له روسې سره جګړه پرمخ یوسي.د اوکراین ولسمشر ولادیمیر زېلېنسکي د پنجشنبې په ورځ په یوه ویډیويي وینا کې وویل: “د اوکرايني وګړو د ژوند ژغورلو له پاره د امکان تر کچې هر څه کوو”هغه ژمنه کړې، چې د امکان تر کچې به د اوکراينيانو د ژوند ژغورلو له پاره هر څه وکړي.يو اوکرايني جنرال “اولکساندر تارنافکسي” د پنجشنبې په ورځ ناوخته ومنله، چې په اوديوکا کې سخته جګړه روانه ده.نوموړي وويل: “موږ د اوکرايين ټولې خاورې ته ارزښت ورکوو، خو زموږ له پاره لومړنی ارزښت او لومړيتوب د اوکراين د عسکرو ژوند ژغورل دي”.بل لور ته د امریکا کانګرېس د دې اوونۍ په پيل کې د ۹۵ میلياردو ډالرو بهرنۍ مرستې پکیچ، چې ۶۰ میليارده د اوکراين هېواد له پاره ځانګړی شوی، له څو مياشتو جنجالونو وروسته تصويب کړ؛ خو دا مسله لا هم د استازو په جرګه کې له خنډونو سره مخ ده.اوديوکا ښار، چې نژدې په بشپړه توګه ويجاړ شوی، دونيڅک ته نژدې پروت ښار دی.دونیڅک، په ۲۰۱۴ کال کې روسي پلوه ملېشو ونېو او وروسته له روسيې سره يو ځای شو.د روسيې ولسمشر ولادمير پوتين د ۲۰۲۲ کال د فبرورۍ پر ۲۴ په اوکراين د برید امر وکړ، له هماغه وخته په اوکراین کې د روسي او اوکرایني ځواکونو ترمنځ سختې جګړې روانې دي.