سر پرست حکومت د دوحې په غونډه کې خپل ګډون رد کړ

د باندنیو چارو وزارت تلویحاً د دوحې په جوړېدونکې غونډه کې خپل ګډون رد کړی دی.د وزارت په خبرپاڼه کې راغلي چې سر پرست حکومت ملګرو ملتونو ته په ډاګه کړې ده، که د دوحې په جوړېدونکې غونډه کې دوی د یوازیني مسوول لوري په حیث ګډونوال شي او د افغان پلاوي او ملګرو ملتونو ترمنځ د ټولو مسایلو په اړه د واضحو خبرو اترو زمینه سازي وشي، په یاده غونډه کې د سر پرست حکومت د استازي ګډون به ګټور تمام شي.د خپرې شوې اعلامیې له مخې، په دې برخه کې د پرمختګ د نشتوالي له امله سر پرست حکومت په دې ناسته کې د دوی بې ګټې ګډون اغېزمن نه دی بللی.د یادونې ده چې، د افغانستان په اړه د ملګرو ملتونو د سرمنشي انټونیو ګوټېرېش په کوربه‌توب په دوحه کې دوه ورځنۍ غونډه سبا یکشنبه پیل شي.سټیفن دو جاربک د ملګرو ملتونو د عمومي سرمنشي ویاند ویلي چې په دې غونډه کې به د افغانستان لپاره د غړو هېوادونو، سیمې او سازمانونو ځانګړي استازي او یو شمېر افغان مېرمنې هم برخه والې وي.دوجاریک دا هم ویلي چې د یوه همغږي، منسجم او رغنده تعامل د زیاتولو څرنګوالی د دې غونډې له هدفونو دی.د نوموړي په وینا دې غونډه کې به د افغانستان د وضعیت اړوند د ملګرو ملتونو د خپلواکې ارزونې د مفصل راپور وړاندیزونه هم په پام کې ونیول شي.په ملګرو ملتونو کې د افغانستان لپاره د ځانګړي استازي ټاکنه د دغه راپور له مهمو سپارښتنو څخه ده.بلخوا سر پرست حکومت ویلي چې په افغانستان کې د یوناما د دفتر په موجودیت کې د نوي استازي ټاکل به اړین نه وي.