د راپورونو له مخې، د سعودي عربستان په جدې ښار کې د اوکراین او امریکا د لوړ پوړو چارواکو تر منځ په لیدنه کې، کییف د «لنډمهالي اوربند» لپاره د امریکا هغه وړاندیز منلی چې له مخې به یې د ۳۰ ورځو لپاره د اوکراین او روسیې جګړه پهدې شرط بنده شي چې روسیه یې ومني.
روسیې لا د اوکراین او امریکا د اوربند په وړاندیز تبصره نه ده کړې خو د بهرنیو چارو وزارت یې یوازې دومره ویلي، چې د امریکایي چارواکو سره مذاکرات ښایي په همدې روانې اوونۍ کې پیل شي.
دغه مذاکرات چې پرون په جدې ښار کې ترسره شوي، دواړو لورو هوکړه کړې، چې ډېر ژر به د اوکراین د معدني منابعو په اړه یو تړون هم لاسلیک کړي.
له بلې خوا د امریکا ولسمشر ډونالډ ټرمپ ویلي، چې د اوکراين ولسمشر ولادیمیر زېلېنسکي ته به یو ځل بیا سپینې ماڼۍ ته د ورتګ بلنه ورکړي.