تسنیم خبري آژانس د ایران سپاه پاسداران او د دغه هېواد پوځ له قوله خبر ورکړی، چې د امریکا له لوري د ایران پر ځینو سیمو د وروستیو بریدونو په ځواب کې یې په کویټ او اردن کې د امریکايي ځواکونو پر پوځي تاسیساتو جلا عملیات ترسره کړي دي.
تسنیم خبري اژانس د سپاه پاسداران د خبرپاڼې په حواله لیکي، چې د «نصر ۲» عملیاتو د اتم پړاو پر مهال یې د کویټ په علي السالم اډه کې د C-RAM مخکیني خبرداري رادار او د امریکايي سرتېرو د راټولېدو ځای د توغندیو او بېپیلوټه الوتکو په ګډ برید په نښه کړی دی.
بلخوا د ایران پوځ ویلي، د «صاعقه» عملیاتو د نهم پړاو په ترڅ کې یې د اردن په الازرق اډه کې د امریکا د پوځ د مخابراتي سیسټمونو، راداري تاسیساتو او د سونګ زېرمو پر وړاندې د بېپیلوټه الوتکو برید ترسره کړی دی. د پوځ په وینا، دغه برید د ایرانشهر د بمپور پر پوځي اډه د وروستي برید په غبرګون کې شوی دی.