د بهرنیو چارو وزارت وایي، په ابوظبۍ کې د افغانستان سفارت د پرله پسې هلو ځلو په پایله کې د متحده عربي اماراتو له بېلابېلو بندخونو د ۵۴ تنو هېوادوالو د راخوشي کېدو هوکړه شوې.
یاد وزارت په یوه خبرپاڼه کې ویلي چې، سرپرست حکومت د عربي متحده اماراتو د دولت له رئیس شیخ محمد بن زاید آلنهیان څخه مننه کوي چې، په روژې میاشت کې یې د افغانانو د راخوشې کولو لورینه وکړه.
د یاد وزارت په وینا، د عربي متحده اماراتو دا ګام له افغانستان سره د دوه اړخیزو دوستانه اړیکو د پالنې ښه څرګندونه کوي.
