د ریاست الوزراء سیاسي مرستیال مولوي عبدالکبیر په ارگ کې بهر مېشتو افغان کادرونو د انسجام ټولنې له استازو سره لیدلي دي.
له ارگ څخه په خپره شوې خبرپاڼه کې ویل شوي، د بهر مېشتو افغان کادرونو د انسجام ټولنې استازي، له بېلابېلو هېوادونو څخه تازه افغانستان ته راغلي دي چې مشري یې ډاکټر عبدالمتین ساپی کوي.
د خبرپاڼې له مخې، بهر مېشتو افغانانو په هېواد کې له اوسني بشپړ امنیت څخه خوښي ښودلې او د افغانستان په بیارغونه او اقتصادي پیاوړتیا په برخه کې یې د همکارۍ ډاډ ورکړی.: «یادو افغان کادرونو په بېلابېلو برخو کې د اسلامي امارت لاسته راوړنې د پام وړ وبللې او ویې ویل، د افغانستان شرایط له هغو سره ډېر توپير لري چې په بهر کې یې خلک د رسنیو له لارې گوري.»
دوی نه ویلي، هېڅوک په افغانستان کې جگړه نه غواړي او نه د جگړه غوښتوونکو ملاتړ کوي، بلکې افغانان د باثباته اسلامي نظام ملاتړ کوي، چې ټول افغانان پکې راټول او حقونه یې خوندي وي.
په دې لیدنه کې د ریاست الوزراء سیاسي مرستیال مولوي عبدالکبیر بهر مېشتو افغانانو ته ویلي، د هر افغان مشورې ته د قدر په سترگه گوري او درناوی یې کوي.: «اوسنی اسلامي نظام د ټولو افغانانو گډ نظام دی او مسوولین ټولو هېوادوالو ته له تبعیض او توپير پرته د خدماتو وړاندې کولو او د ستونزو د حل کولو مکلفیت لري. په اسلامي نظام کې نشهيي توکي، فساد او زورواکي نهشته، غصب پای ته رسېدلی او د اقتصادي پياوړتیا لپاره هڅې روانې دي.»
نوموړي همدا راز ویلي، دا مهال د ټولو ولایتونو ترمنځ په حلقوي او ولایتي سړکونو کار پیل شوی او یا به په نږدې وخت کې پیل شي، پانگونې پراختیا موندلې، بودیجه له خپلو عوایدو پوره کېږي، د برېښنا، روغتیا او پوهنې په برخه کې په اساسي پروژو کار روان دی.
اوسمهال د نړۍ د بېلابېلو هېوادونو څخه د هغو افغانانو راتګ هېواد ته پیل شوی، چې له لسیزو راهیسې بهر مېشت وو. دوی له گڼو مسوولینو سره لیدنې کتنې کوي او په ځینو برخو کې مسوولو کسانو ته مشورې ورکوي.