د سرحدونو، قومونو او قبایلو چارو وزارت ویلي، چې د یاد وزارت د سرحدي پلټنو معین مولوي عنایتالله شجاع په مشرۍ د دغه وزارت یوه ګډ پلاوي د خوست ولایت په مرکز کې د اسلامي نظام تر چتر لاندې د شریعت د نفاذ او له ولسونو سره د همغږۍ په موخه ولسي غونډه ترسره کړې ده.
ښاغلي شجاع په دې غونډه کې د خوست د خلکو تېرې قربانۍ او سرښندنې ستایلي او اسلامي نظام یې د ټولو خلکو ګډ نظام بللی دی. نوموړي د افغان حکومت مسوولین د ولسونو خادمان بللي او ټینګار یې کړی، چې خلک د تېرو ناامنیو او ظلمونو بیا تکرار نه غواړي.
قومي مشرانو د خوست د خلکو پر یووالي ټینګار کړی، د افغان حکومت د فعالیتونو او پروژو ستاینه یې کړې او ځینې سیمهییزې ستونزې یې له مسوولینو سره شریکې کړې دي.


