شېر کړئ Facebook Twitter بریښنالیک Telegram WhatsApp لیکوال: سائس سعیديد سرپرست حکومت هغه مخالفین چې تېر شل کلونه یې په افغانستان کې ډیرې بدبختۍ رامنځ ته کړې، د «بُن» د شرموونکې تړون له لاسلیک څخه نیولې، افغانستان ته د اشغالګرو د پښو تر راکاږلو، د شل کلنې جګړې، وراني، د افغانانو د شهادتونو، تباهۍ او هرې بدبختۍ اصلي عاملین همدوی وو. وروسته له هغې چې افغان ملت د خپلو شلو کلونو هڅو، سرښندنو او قربانیو پایله ولیده او د دې خاورې مکار او مستکبر دښمن، غدارې امریکا ماتې وخوړه او افغانستان د مؤمن او مجاهد ولس لخوا ونیول شو، د سرپرست حکومت رهبر د دې حرکت او نظام ټولو دښمنانو ته عمومي عفوه اعلان کړه.خو له بده مرغه د جمهوريت مشرانو د دې پر ځای چې له عمومي عفوې څخه ګټه واخلي او په خپله خاوره کې د ملت تر څنګ په عزت سره ژوند وکړي، په ګاونډیو هیوادونو کې یې له ذلت څخه ډک او د پردیو د دروازو شاته ژوند غوره وباله.په تیرو څلورو کلونو کې، د سرپرست حکومت دغه مخالفین آرام نه دي ناست، هڅه یې کړې چې د افغانستان د حکومت له لوري په دې خاوره کې د مظلوم افغان ملت لپاره رامنځ ته شوی امن او ارام، چې په سیوري کې یې د افغانانو امنیت، اقتصاد او پانګې وده کړې ده، بیرته په هماغه ناوړه او بد بویه پخواني میراث، نا امنۍ، ګډوډۍ او په زرګونو نورو بدبختیو بدل کړي.نو ویلای شو چې د سرپرست حکومت مخالفین په دې خاوره کې د نا امنۍ، وژنو، تخریب او ورانیو د میراث د بیا راژوندي کولو په لټه کې دي. هغه بد بویه میراث چې په نړۍ کې یې په سیاسي، نظامي، اقتصادي او فرهنګي ډګرونو کې د افغانانو عزت او آبرو له منځه وړي او په تېرو شلو کلونو کې یې له افغان ملت څخه یو ذلیل او ځان پلورونکی انځور نندارې ته وړاندې کړ، هغه ناوړه انځور چې د دې مجاهد او زیارکښ ملت وړ نه و.د دې لامل چې د سرپرست حکومت مخالفین لا هم په افغانستان کې د ناورین د رامنځ ته کولو په لټه کې دي، دا دی چې دوی هر یو په یوه استخباراتي دستګاه پورې تړلي دي، له همدې سرچینې یې پخوا هم عواید ترلاسه کول او نن هم خپله دنده پېژني، تر څو د خپلو جیبونو د ډکولو لپاره هماغه پخوانۍ لارې ته دوام ورکړي.په دې وخت کې مهمه خبره دا ده چې د سرپرست حکومت مخالفین باید په دې پوه شي، چې افغانان د هغه پخواني شناخت له مخې چې له دې مخالفینو څخه یې لري، دا ځل یې په وړاندې په فولادي عزم ولاړ دي، اجازه به ورنه کړي چې دا خاوره یو ځل بیا د سیمه ییزو او نړۍوالو سیالیو په ډګر بدله او د افغانانو خپلواکي او آزادي ترې واخیستل شي.یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
