د ریاستالوزراء اقتصادي معاونیت خبر ورکړی، چې د ملا عبدالغني برادر په مشرۍ د تدارکاتو کمېسیون نوبتي غونډه کې د ۴.۲ میلیارده افغانیو په ارزښت ۱۵ پروژې منظورې شوې.
سرچینې زیاته کړې، چې دې غونډې ته له اجنډا سره سم ۳۱ پروژې د منظورۍ لپاره وړاندې شوې وې، چې له ډلې یې ۱۵ پروژې منظورې او اووه تعدیل شوې.
په منظور او تعدیل شویو پروژو کې د غزني ولایت د زردالو بند د جیوتخنیک مطالعاتو بشپړول، د بلخ ولایت د حیرتان بندر د ۱۴ کیلومتره سړک جوړول، د کابل–لوګر سړک د لومړي لاټ له پای څخه تر سنګ نوشته پورې د سړک جوړول، په فاریاب، غزني، دایکندي، بادغیس، بامیان، خوست ولایت کې د عمومي روغتونونو جوړول او په مختلفو ولایتونو کې د برښنا رسونې او توزیع پروژو د پاتې چارو بشپړول شامل دي.
د ریاستالوزراء اقتصادي معاونیت دا هم ویلي، چې منظور شوې پروژې د افغان حکومت له لوري تمویلېږي.