د انادولو خبري اژانس د راپور له مخې، د ترکیې ولسمشر رجب طیب اردوغان او د قطر امیر شیخ تمیم بن حمد آلثاني په استانبول کې د متقابلې دفاع تړون لاسلیک کړی دی.
سرچينې ويلي، د دغه تړون له مخې، دواړه هېوادونه ژمن شوي چې د یوه هېواد پر وړاندې د بهرني پوځي برید په صورت کې به ګډ دریځ غوره کوي او په دفاعي او پوځي برخو کې به خپلې همکارۍ پراخوي.
اردوغان ویلي، ترکیه او قطر به د فارس خلیج په سیمه کې د جګړې د مخنیوي، خبرو اترو او سولې د ټینګښت لپاره خپلو همکاریو ته دوام ورکړي.
د دواړو هېوادونو ترمنځ له دفاعي تړون وراخوا، د پوهنې او سولې په برخو کې هم تړونونه لاسليک شوي دي.