د احصايې او معلوماتو ملي اداره وايي، د دغې ادارې د ارقامو د تحليل له مخې تېره چنګاښ مياشت کې د هېواد په کچه د صادراتو ټول ارزښت ۱۰۴ ميليون ډالر او د وارداتو ټول ارزښت یو میلیارد او ۱۹۱.۱ ميليون ډالرو ته رسېږي.
سرچينه وايي، دا په داسې حال کې ده چې په غبرګولي مياشت کې د هېواد د صادراتو ټول ارزښت ۶۳.۱ میلیون ډالرو او په چنګاښ میاشت کې د صادراتو ارزښت د روان کال د غبرګولي میاشتې په پرتله ۴۰.۹ ميليون ډالره زیاتوالی لري.
ياده اداره همدا راز وايي، چې په غبرګولي میاشت کې د هېواد د وارداتو ارزښت ۹۳۷.۲ میلیون ډالرو ته رسیده، چې چنګاښ مياشت کې د تېرې میاشتې په پرتله ۲۵۳.۹ میلیون ډالرو په ارزښت زیاتوالی پکې راغلی دی.
ارقام ښيي چې تر ټولو زيات صادرات پاکستان، هند او تاجکستان ته شوي او تر ټولو زیات واردات له ایران، چین او پاکستان هېوادونو څخه وو.