د ايران بهرينو چارو وزير عراقچي ویلي، چې که له واشنګټن سره خبرې ناکامې شي، ایران جګړې ته چمتو دی او دا جګړه به ټوله سیمه اغېزمنه کړي.
نوموړي زیاته کړې، چې لا هم له امریکا سره د هوکړې امکان شته، خو واشنګټن د باور وړ نه دی.
بلخوا بيا، امریکا په منځني ختیځ کې د برید پر ځای دفاعي بڼه خپله کړې، دفاعي سیستمونه پیاوړي کوي، څو د ایران ځوابي برید مخه ونیسي، چې دا د برید په اړه ښکاره تردد ښيي.
په اسرائیل کې هم د برید په اړه نظرونه ویشلي دي، ځیني اسرائیلي چارواکي باور لري چې واشنګټن ښايي له تهران سره هوکړه وکړي؛ ځکه واشنګټن له داسې جګړې ډډه کوي چې لګښتونه یې لوړ او پایلې یې نامعلومې وي.
د دې ترڅنګ، خلیجي هېوادونه هم هڅه کوي چې د امریکا او ایران ترمنځ د احتمالي جګړې مخه ونیسي او د همدې لپاره یې د منځګړیتوب هڅې پيل کړې دي.