د احصایې او معلوماتو ملي اداره وايي، د ۱۴۰۲ کال په کب میاشت کې د څه باندې ۱۴۱ مېلیونه ډالرو په ارزښت صادرات شوي دي.
له یادې ادارې څخه په خپره شوې خبرپاڼه کې ویل شوي، په ياده مياشت کې د هېواد په کچه د صادراتو ټول ارزښت ۱۴۱٫۱ مېليون ډالر او د وارداتو ټول ارزښت ۷۸۹٫۶ مېليون ډالرو ته رسېږي.:«د ۱۴۰۱ کال په کب مياشت کې د هېواد د صادراتو ټول ارزښت ۱۷۴ مېلیون ډالرو ته رسېد. د ارقامو دا تحلیل ښيي چې د ۱۴۰۱ کال د کب مياشتې صادراتو د ۱۴۰۲ کال د همدې مياشتې د صادراتو په پرتله ۳۲٫۹ مېليون ډالره زیاتوالی درلود.»
د خبرپاڼې له مخې، له بل لوري د ۱۴۰۱ کال په کب میاشت کې د هېواد د وارداتو ارزښت ۶۹۰٫۴ مېلیون ډالرو ته رسېده، چې د ۱۴۰۲ کال په یاده مياشت کې د ۹۹٫۲ مېلیون ډالرو په ارزښت زیاتوالی پکې راغلی دی.: «ارقام ښيي چې د ۱۴۰۲ کال په کب مياشت کې تر ټولو زيات صادرات پاکستان، هند او متحده عربي اماراتو ته شوي دي، په داسې حال کې چې د ۱۴۰۱ کال په کب مياشت کې تر ټولو ډېر هغه یې پاکستان، هند او چین ته وو. همدارنگه د ۱۴۰۱ او ۱۴۰۲ کال په کب میاشت کې ترټولو زیات واردات له ایران، پاکستان او چین څخه وو.»
د یادونې وړ ده، چې صادراتو کې صادرات او بياځلي صادرات شامل دي او په وارداتو کې ټول محصولي او غير محصولي واردات حساب شوي دي.
افغانستان لا هم د نړۍ د هغو هېوادونو څخه دی، چې د صادراتو او وارداتو ترمنځ یې غټ واټن موجود دی. د اقتصادي چارو کارپوهان وايي، افغان حکومت باید د صادراتو کچه لوړه او د وارداتو کچه کمه کړي.