د افغان حکومت د دفاع وزارت له لوري په خپره شوې یوه خبرپاڼه کې ویل شوي، چې د افغانستان دفاع وزیر “محمدیعقوب مجاهد” کابل کې د جاپان له سفیر “تاکايوشي کورومايا” سره کتلي دي.
د ياد وزارت د خبرپاڼې پر اساس په دې کتنه کې د دواړو هېوادونو ترمنځ د اړیکو پر ټینګښت ټينګار شوی او ويل شوي، چې افغان حکومت له ټولو هېوادونو سره د ښو اړیکو غوښتونکی دی.
د خبرپاڼې د معلوماتو له مخې په کابل کې د جاپان سفیر هم په دغه کتنه کې د سرتاسري امنیت او له نشه یي توکو سره د مبارزې په برخه کې د افغان حکومت د کړنو ستاینه کړې او ويلي يې دي، چې جاپان د افغانستان له خلکو سره د روغتیا، کرنې، زده کړو او په نورو برخو کې د همکاریو دوام ته ژمن دی.
چاپان یو له هغو هېوادونو څخه دی، چې له افغانستان سره یې په بېلابېلو برخو کې تل همکاري کړې او اوس یې هم د خپلو همکاریو پر دوام ټینګار کړی دی.