د ایران منتخب ولسمشر مسعود پزشکیان د فلسطین د خلکو هر اړخیز حمایت او ملاتړ باندې تاکید کړی دی او ویلي یې دي، چې د دوی ملاتړ ته به دوام ورکوي.
د ایسنا د راپور پر اساس ویل کیږي، چې پزشکیان د چهار شنبې ورځ د جولی پر لسمه د حماس سیاسي دفتر مشر “اسماعیل هنیه” ته په یو لیږل شوي لیک کې دغه څرګندونې کړې دي.
نوموړي زیاته کړې، چې د ایران اسلامي جمهوریت د اسرائیلو پر وړاندې د فلسطین د خلکو د مبارزې ملاتړ کوي او دا یې “اسلامي او انساني دنده” بللې او زیاته کړې یې ده، چې د فلسطین د خلکو هر اړخیز ملاتړ ته به دوام ورکوي.
هغه زیاته کړه: ” زه مطمئین یم چې د اسرائیلو د ظلمونو پر وړاندې د فلسطین او د غزې د خلکو مجاهدت او قهرماني د قدر وړ دی او د دوی مقاومت به حتمن د الله تعالی په نصرت سره بریالی کیږي او بریا به د فلسطین د خلکو په نصیب کیږي”.
له دې وړاندې پزشکیان په لبنان کې د حزب الله مشر “حسن نصرالله” ته په لیږلي پیغام کې ویلي وو، چې ایران د اسرائیلو پر وړاندې په سیمه کې د مقاومت ملاتړی دی.