غزه کې مبارزه کوونکي حماس اسلامي غورځنګ د يوې اعلاميې په خپرولو سره د غزې له نتارسيم سيمې څخه د صهيونيستي رژيم د پوځيانو په بشپړه توګه وتل د فلسطين په وړاندې د اسرائيلو ماته او ناکامي بللې ده.
حماس غورځنګ زياته کړې چې غزې ته د فلسطينيانو راستنېدل، د بنديانو خلاصون او د صهيونيستي اسرائيلو وتل د نتنياهو دا خبره ردوي چې وايي موږ کامياب شوي يو.
په اعلاميه کې دغه راز راغلي «د اشغالګرو مورال کمزوری او مات دی خو موږ د پخوا په پرتله لا قوي، ځواکمن او ډاډه يو».
حماس اسلامي غورځنګ دغه راز د غزې د تخليې په اړه د ټرمپ وروستيو څرګندونو ته په غبرګون کې ويلي، اسرائيلو چې په ۱۵ مياشتو کې په لوږه او قتل عام مات نشو کړای د ټرمپ خبرې خو مو بېخي نه شي ماتولی.
په اعلاميه کې همدا راز راغلي چې غزه به د خپلو خلکو او مجاهدینو په شتون غزه وي او دا به د اشغالګرو او د هر هغه چا لپاره چې د لاسته راوړلو کوښښ یې کوي حرامه وي.