لیکوال: شمس الله شهير
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د حماس لفظ د (حرکة المقاومة الاسلامیة) لنډیز دی، په ۱۹۸۷ میلادي کال د شیخ احمد یاسین او د اخوان المسلمین د حزب د څو نورو پلویانو له لوري تاسیس شو او د دغه نوم لاندې د فلسطین ساحه کې د اسرائیلي اشغالګرو په خلاف اعلان شو، له دې وړاندې هم د مقاومت ډلې وې خو په دغه نوم سره کوم غورځنګ شتون نه درلود.
دا غورځنګ د صهيونيستي رژيم په وړاندې وسله واله مبارزه کوي، د حماس د فعالیت سیمه د غزې تړانګه ده، حماس په کمو امکاناتو مختلف قسم توغندۍ او الوتکې جوړې کړي، چې پرمختللي توغندۍ یې د عیاش ۲۵۰ په نوم دي، ياد غورځنګ اوسمهال د صهيونيستي رژيم په وړاندې د قتال په حال کې په خپله د ټولې اسلحې تولید او جوړښت ترسره کوي.
د حماس غورځنګ شعار له اولې ورځې د فلسطین آزادي وه، د ازادۍ یا شهادت په مرال جنګېدل، په ټوله سیمه کې یوازینی غورځنګ دی چې صهيونيستي رژيم ترې وېره لري، د فلسطین له داخلي مسلمانانو جوړ او د اخوان المسلمین تر اثر لاندې دی.
ددې غورځنګ سیاسي لېد؛
حماس غورځنګ فلسطین د مسلمانانو ملک بولي، یهودو ته د هېڅ حق قائل نه دی، د دوی هڅه د اسرائيلي اشغالګرو د شړلو ده، سولې او موقت اوربند ته چمتو نه دي، د دوی مقاومت د اسرائیلو د وجود په وړاندې دی، اسرائيلو ته د غربي صهیوني استعمار په سترګه ګوري، دوی د جهاد او مقاومت فکر لري، د اسرائیلو د شړلو او ایستلو یوازینی لاره جهاد بولي.
حماس غورځنګ په دیني، ټولنیز او سیاسي مجال کې فعالیت لري، مختلفې موسسې داخل د فلسطین او خارج کې لري، د نړۍ له هېوادونو سره سیاسي اړیکې ساتي، خپل استازي ملکونو ته لېږي.
د حماس غورځنګ مؤسس:
په لومړي وخت کې چې دغه غورځنګ اعلان شو د شیخ احمد یاسین په مشرۍ و، هغه په پښو معذور و، خو په فلسطینیانو کې زیات اهمیت ورکول کېده، تل یې فلسطینیان ویښ او بیدار ساتل، شیخ احمد یاسین به ویل: دا ځمکه د فلسطیني ولس په شمول د ټول اسلامي امت شریکه ده، هیڅ یو عرب یا عجم حکمران دا حق نه لري چې پر سر یې له چا سره سودا وکړي.
شیخ احمد یاسین په ۲۰۰۳ کال کې د یهودو په یوه هوایي برید کې زخمي شو او په ۲۰۰۴ کال کې بیا په یو بل هوایي برید کې په شهادت ورسېد.
له شهید احمد یاسین رحمه الله څخه وروسته د حماس عمومي مشري الشیخ عبدالعزیز رنتیسي ته وسپارل شوه، خو هغه هم په ۲۰۰۴ کال کې د یهودیانو په یو هوایي برید کې په شهادت ورسېد.
له هغې وروسته د ټاکنو او نورو ګډوډيو وروسته اسمعیل هنيه، يوه لسیزه وړاندې د حماس جهادي غورځنګ مشر وټاکل، شو او د تير ۲۰۲۳ اکټوبر ۷ تاريخي عملياتو سره بيا د رسنيو سر ټکی شو.
هنيه په وروستيو مياشتو کې د جهاد او قتال په لاره کې د کورنۍ ۲۲ تنه له لاسه ورکړل، خو د تضعیف په ځای یې د نوموړي مرال لا قوي کړ، دی وخت په وخت رسنيو ته را څرګند کيده او له خپلې داعيې او قتال څخه به دفاع کوله.
نوموړی وړمه ورځ تهران ته د ياد هيواد د نهم ولسمشر مسعود پزشکيان د لوړې مراسمو ته راغلی وو، پرون ورځ یې د جهاد او قتال په سپيڅلې داعيې سره د ټولو رسنيو او هلته د تللو مشرانو توجو ور جلب کړې وه؛ هنيه نن سهار وختي ۲ بجې په شهادت ورسید، نحسبه کذالک والله حسیبه.
خو دا د خفګان او افسوس ځای نه ده، بلکې دا څه کم ۴ لسيزې سفر سره حماس هر ځل د مشرانو او سپاهيانو له قربانيو سره قوي او پرمختللی شوی ده، وروستی بېلګه یې د تير ۲۰۲۳ کال د اکتوبر اوومه ده.
حماس يو فکر او بنسټ دی، د دې جهادي غورځنګ هر غړی اسماعیل هنيه، شهيد ياسين او شیخ عبدالعزیز تقبلهم الله تعالی په شان زړور سپاهيان دي.
دا وینې او قرباني به حماس لا وغړوي، له عربه تر عجمه به دې صف ته ځوانان لکه سیلاب ور روان وي، په قربانيو او شهادتونو باندې فکر، بنسټ او صف لمنځه نه شي تللی، بلکې د ورک استاد ياسر معروفه وینا: د جهاد لپاره د شهيد وينې بنزین او د پطرول تېل دي، چې حرکت پرې کوي.
