د ریاست الوزراء اداري مرستیال مولوي عبدالسلام حنفي په بدخشان کې «د افغانستان د گرځندوی ملي جاذبو کنفرانس» کې په بېلابېلو موضوعاتو خبرې کړې دي او په بهر کې مېشتو افغانانو څخه یې غوښتي، چې خپل هېواد ته راشي او د افغانستان په پرمختگ کې خپله ونډه واخلي.
نوموړي ویلي، اسلامي امارت هڅه کوي د واټونو او لویو لارو په جوړولو سره افغانستان له بېلابېلو دهلېزونو په ځانگړي ډول د واخان کوریدور له لارې د یوې لارې یو کمربند پروژې سره ونښلوي، ترڅو د گاونډيو د اقتصادي او ټکنالوژۍ له گټو استفاده وشي او د هېواد د برېښنا بندونو په جوړولو سره د انرژۍ له واردولو خلاص شو.:«افغانستان یو کرنیز هېواد او پراخه کانونه لري. د دې ترڅنگ له طبیعي ښکلاوو څخه ډک او معتدل اقلیم لري.د هېواد بېلابېل ولایتونه لرغوني ابدات لري، چې له بېلابېلو تمدنونو څخه راپاتې دي. که په افغانستان کې گرځندوی ته کار وشي، لرې نه ده چې له دې لارې هر کال گڼ عواید تر لاسه کړو.»
ده زیاته کړه، اسلامي امارت له ټولو گاونډیانو سره په اقتصادي، فرهنگي او سیاسي برخو کې د ښو او دوستانه اړیکو غوښتونکی دی او هېچا ته د دې اجازه نه ورکوي چې د افغانستان له خاورې د دوی امنیت ته گواښ پېښ کړي، دغه راز له دوی هم د نه لاسوهنې د اصولو په پام کې نیولو سره دوستانه او نېکې اړیکې غواړي.
ښاغلي حنفي په بهر کې مېشتو افغانانو ته وویل، افغانستان زموږ د ټولو افغانانو گډ کور دی، ټول پکې د گډ ژوند کولو حق لري، اسلامي امارت به د دوی مال او ځان خوندي کوي، له دوی یې وغوښتل چې هېواد ته راستانه او د افغانستان په پرمختگ او ابادۍ کې ونډه واخلي.