افغانالاصله پخواني امریکایي ډیپلوماټ، زلمي خلیلزاد د امریکا غږ او ازادۍ راډیو د بندېدو په اړه د ایلن ماسک وروستیو څرګندونو ته په اشارې ویلي، د یادو رسنیو په اړه باید په بشپړه توګه څېړنې وشي.
د خلیلزاد په خبره، د امریکا غږ او ازادۍ راډیو پروګرامونه د خبریالانو پر ځای د فعالانو له خوا پرمخ وړل کېږي، چې د امریکا د ګټو پر ځای د خپلو موخو لپاره د امریکا د مالیه ورکوونکو پیسې مصرفوي.
نوموړي د اېکس پر ټولنیزه شبکه لیکلي: «هغو کسانو چې د یادو رسنیو پروګرامونه له نږدې څارلي وايي، چې دغه رسنۍ د امریکا د سیاستونو خلاف خپرونې کوي.» خلیلزاد زیاتوي، چې امریکایي مالیه ورکوونکي باید د امریکا ضد پروپاګند تمویل نه کړي.
تر دې وړاندې ماسک، د ازادۍ راډیو اروپا څانګې او امریکا غږ د فعالیتونو د درولو غوښتنه کړې وه او د دغو رسنیو مسؤلین یې چپ افراطي لیونیان بللي وو.