لیکوال: ارغوان وطنیار
د حکومت سترګې بینا او لاسونه اوږده دي او غوږونه یې هم کاڼه نه دي، د بغاوتګرو هر قدم څارل کېږي او لیدل کېږي، د دوی د پښو هره ښکالو اورېدل کېږي.
تازه د بغلان په نهرین کې څو خودفروشه او ضمیر فروشه کسانو غوښتل د خلکو څخه د ارامۍ نعمت وتروړي، د خلکو ژوند ته ګواښ پېښ کړي او سیمه کې د خارجي استخباراتو لپاره ځالې جوړې کړي.
تېره ورځ د بغاوت د ډلې څو کسانو یوه ویډیو په رسنیو کې خپره کړه چې قومندان عبدالصمد حمزه پکې خبرې کولې او تر شا یې مسلح کسان ولاړ وو.
دوی د امنیتي ځواکونو په وړاندې د درېدلو توان نه لري، یوازې د رسنیز پوښښ لپاره د غرونو په تالونو او ناوونو کې غلچکي ويډیوګانې جوړوي؛ هدف یې معلوم دی، لوی هدف یې له بهرنیانو د معاشونو او ډالرو غوښتل دي، هغوی ته همدا ویډیوګانې د خپل کاري راپور په توګه لېږي، دویم هدف یې دادی چې دوی غواړي یو نظامي مانور ترسره کړي او خپل نظامي حضور ثابت کړي.
خو دوی ناخبره دي چې د افغانستان د امنیتي او کشفي ادارو لومې او دامونه د غرونو په ناوونو کې هم خواره دي، که هر څوک د وطن د تېرلو ښکار پسې راځي د وطن د اصیل بچیانو ښکار به ګرځي.
څنګه چې د بغاوتګرو سرکرده عبدالصمد حمزه او قومندان خیرالله د افغانستان د زړورو سپاهیانو د ښکار تومه (د ښکاره خوراک) شول؛ دوه لوی قومندانان د خپلو نادانو چریکانو سره یو ځای د ابدیت کندې ته ټېل وهل شول.
د افغانستان زړور او شمشیرزن سپاهیان دوی ته یو پیغام لري هغه دا چې د پردیو په ډالرو مه وطن خرڅوﺉ، مه دین خرڅوﺉ او مه مو بچي خواروﺉ.
ستاسې هر حرکت بې ځوابه نه پاتې کېږي او هغه ځواب د توري دروند ګوزار دی، د بغاوتونو هره درنه څپه به د بغاوتګرو په محوه کولو تمامېږي.
د افغانستان ولس په وطن کې پردۍ نیابتي جګړې نه غواړي او نه هم پردۍ نیابتي ډلې زغمي؛ په نهرین کې څو کسانو سر پورته کړ د سر پورته کولو سره هم مهاله یې سرونه و رېبل شول.
دغه قاطع دریځ نورو بغاوتګرو ته زموږ د سرتېرو صریح او واضح پېغام دی، د افغانستان اسلامي امارت رحم ډېر پراخ دی، تر عفوې وروسته د کرزي او عبدالله په سویې لوی مجرمین وبښل شول، یوازې دا نه چې بښل شوي، بلکې د افغانستان سرتیري یې سرونه هم ساتي، د کورونو څوکۍ او پېرې یې هم کوي، د دفترونو لګښتونه یې هم تامینوي.
همداسې د تېري ادارې سرتیري د اردو په لیکو کې خدمت کوي، د تېر نظام پولیس او ترافیک اوږه په اوږه د اسلامي امارت له مجاهدینو سره شپه او ورځ د وطن په خدمت بوخت دي؛ مګر که د چا د یو منلي او مقتدر نظام په ضد قد علَم وکړ، بیا ورته د قومندان حمزه او خیرالله غوندې سبق ورکول کېږي.
وطن یو دی، بدیل یې نشته، د وطن په ضد شنې ډالرې راوړل، له فرانسې او تاجکستان څخه وسلې راوړل، دغسې جانبي عوارض لري.
دهندوکش له لوړو څنډو تر پامیره او بابا غره پورې مرغۍ هم زموږ د سرتیرو له سترګو پناه نه وي.
په خپل ژوند باندې قمار مه وهئ، مه اولادونه خواروﺉ، زموږ د سرتېرو اقدام ډېر تېز او چټک دی، د سترګو په رپ کې به مو سر ته ولاړ وي.