د مخابراتو او معلوماتي ټېکنالوجۍ وزارت ویاند عنایت الله الکوزي ویلي، چې د احصایې او معلوماتو ملي ادارې د کاغذي پیژندپاڼو د اساس کتابونو د ډیجیټلي کولو سیسټم بیا ځلې فعال او ګټې اخیستنې ته سپارل شوی.
ښاغلي الکوزي زیاته کړې، چې یاد سېسټم له ۱۴۰۰ هـ.ش کال راپه دېخوا د یو لړ تخینکي ستونزو له امله غیرفعال و، چې د مخابراتو او معلوماتي ټېکنالوجۍ وزارت د ډیجیټل حکومتولۍ د ریاست له لوري بیا ځلي فعال او ګټې اخیستنې ته چمتو شو.
د نوموړي په خبره، یاد سیسټم د هېواد په کچه یو له مهمو سیسټمونو څخه دی او د کاغذي پیژندپاڼو د اساس کتابونو د آرشیف او الکټرونیکي کولو پروسه پکې مخې ته ځي.
د ویلو ده، چې په یاد سېسټم کې ګڼې مهمې برخې په پام کې نیول شوي، چې پر بنسټ یې اصلي معلومات راټولېږي او په دقیق او منظم شکل ذخیره کېږي او له مخې یې راتلونکي لپاره د باور وړ معلومات خوندي پاتې کېږي.