د ازموینو ملي ادارې نن د حکومت د اطلاعاتو او رسنيو په مرکز کې د خپل تېر يو کلن بهير لاسته راوړنو او راتلونکو پلانونو د تشریح پر مهال ویلي چې، د ۱۴۰۴ کال کانکور ازموینه د طب، ساینس او ټولنیزو علومو برخو کې اختصاص شوې ده او په همدې اختصاصي برخو کې به لومړی کسان غوره کېږي او بیا به ترې په اړونده برخه کې ازموينه اخيستل کېږي.
د ازموینو ملي ادارې د پوښتنو بانک د تنظیم چارو رئیس عرفان الله عباد ویلي، په دې اړه د پوهنې او لوړو زده کړو وزارتونو سره هم خبرې شوې دي. همدارنګه د ښاغلي عباد په وينا، کانکور کې به هرې برخې ته د هغې برخې سوالونه راوړل کېږي او د هرې برخې لېوال به تر ازموینې وړاندې مشخص کیږي.په دې سربېره نوموړي زیاته کړې، چې د دې لپاره یې طرزالمعل هم جوړی کړی، چې د لوړو زده کړو وزارت د رهبرۍ له لوري تائید شوی هم دی.
يادې ادارې د یو کلنو لاسته راوړنو په اړه وويل چې،په تېر کال یې له ۱۷۷۰۲۰ کسانو ازموینه اخیيستې چې له ډلې یې ۸۷۱۰۳ بریالي کسان بېلابېلو ادارو ته ورپېژندل شوي دي. په همدې ډول، د بېلابېلو ادارو ۵۸ ډله ییزې ازموینې په پوره شفافیت سره اخیستل شوي او پایلې یې هم اعلان شوي دي.
د يادې ادارې د مسئولینو په وینا، د ۱۴۰۴ کال کانکور لپاره د اړینو تدابیرو نیول، د افغانستان د ازموینو قانون مسودې نهايي کول، د ادارو د ډله ییزو ازموینو اخیستل، د سیستمونو پراختیا، د اوو زونونو په کچه د ادارې د دویمي واحدونو تجهیز او د تخنیکي او اداري سیستمونو معیاري کول، په روان کال کې د ادارې له مهمو لومریتوبنو څخه دي.