سیاست د اوږدمهاله او ډاډمنو برنامو هغه پراخ ډګر دی چې د سترو او اغېزناکو موخو د ترلاسه کولو، د ملي ګټو او غوښتل شويو مصلحتونو د خوندي کولو لپاره تجربه لرونکو او وړ اشخاصو ته اړتیا لري؛ داسې کسان چې وکولای شي له ننګونو سره په اغېزناک ډول مقابله وکړي، خنډونه له منځه یوسي او د نظام د واک او حاکمیت د ټینګښت لپاره په بریالیتوب سره عمل وکړي.
د ځواک د ترلاسه کولو او د نفوذ د پراختیا دې پړاو ته د رسېدو لپاره جدي، له وړاندې چمتو او روزل شويو کسانو ته اړتیا ده؛ داسې کسان چې د دې لوړو اهدافو د پرمخ بېولو لپاره یې اړینه روزنه ترلاسه کړې وي، ترڅو د عمل په ډګر کې په دې ښه پوه وي چې څه وخت اقدام وکړي، په کوم ځای کې عمل وکړي او په کومو شرایطو کې شاتګ غوره کړي.
ډېر کله پر نورو هېوادونو د تېري او هلته د لاسوهنې لپاره دا ډول پلانونه او سازمان شوې چارې کلونه کلونه دوام کوي، ترڅو په پایله کې استعماري موخې ترلاسه او د دوامداره نفوذ تر سیوري لاندې د اشغال پلان عملي شي. خو دا ډول نقشې تل بریالۍ نه وي، ډېری وختونه یې رازونه تر عملي کېدو وړاندې افشاء کېږي او طرحه کوونکي یې په ښکاره رسوا کېږي.
په داسې شرایطو کې، نفوذي کړۍ اړ کېږي چې خپلې لارې او تګلارې بدلې کړي او له رسوا کېدو وروسته هم په پوره بې شرمۍ خپلې دسیسې په لا څرګند ډول روانې وساتي، په دې هیله چې په هره بیه خپل ځان د بریا په څنډه کې وساتي او د خپلو پټو عملیاتو ناکامي جبران کړي.
هغه څه چې په دې وروستیو ورځو کې د بدخشان د پولې په سیمو کې د وسلوالو او جنګ غوښتونکو کسانو په راڅرګندېدو روان دي او پاکستان یې په مستقیم ډول تر شا ولاړ دی، همدارنګه هغه تښتېدلي مخالفان چې په ښکاره یې ملاتړ کوي او د خپلې لارې مشال یې ګڼي، په حقیقت کې د هماغو توطیو پاتې شوني دي چې پاکستان یې د افغانستان د اوسنیو شرایطو د ګډوډولو لپاره عملي کول غواړي. په دې برخه کې، له غولېدلو کسانو څخه د تښتېدلو او بهر مېشتو مخالفانو د تبلیغاتي او رسنیز ملاتړ لپاره ګټه اخلي.
خو دا ډول توطیې چې کله په پټه مرحله کې له ماتې سره مخ او له وړاندې جوړ شوي پلانونه تر عملي کېدو د مخه افشا شي، نو د ښکاره مقابلې او مخامخ تقابل په ډګر کې به هم هېڅکله بریالي نه شي؛ ځکه هېڅ حاکمیت به اجازه ورنه کړي چې د خپلې خاورې په قلمرو کې یې کوم فرد یا ډله د داسې تېري او لاسوهنې جرئت وکړي، که هغه غولېدلي کورني ځوانان وي او یا کوم ګاونډی هېواد چې د اسلامیت د دعوې مخینه لري.
یو څه چې په دې منځ کې ارزښت لري، د ملي خپلواکۍ ساتنه او د بهرني یرغل په وړاندې د هېواد له خاورې او ملي حریم څخه دفاع ده؛ هغه اصل چې له مخې به یې هر ډول بهرنی تېری او لاسوهنه که په هره بڼه چې وي، شنډه او له پیله به وځپل شي.
د یادونې وړ ده چې اوسني افغانستان د تېرو پنځو کلونو په اوږدو کې ثابته کړې چې د هر ډول تېري پر وړاندې د درېدو وړتیا لري او په دې برخه کې هېڅکله بې وسه نه دی. دا هغه حقیقت دی چې د جمهوریت پر مهال نه تر سترګو کېده او د هغه وخت د رژیم مشران هېڅکله دې پړاو ته ونه رسېدل، د هر ګواښ پر وړاندې به یې په چټکۍ سره شاتګ کاوه او تسلیمېدل.
اوس د هماغو کسانو پاتې شوني، د دې پلانونو او غولېدلو کسانو په ملاتړ، داسې انګېري چې د اوسني حکومت ټینګ بنسټونه د نړېدو په درشل کې دي؛ خو دا تصور له یوې کمزورې او بې بنسټه انګېرنې پرته بل څه نه دی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.