د افغانستان د سرپرست حکومت مرکزي وياند مولوي ذبيح الله مجاهد د يوې اعلاميې په خپرولو سره ويلي، د اسرائیلي رژيم له لوري د سوريې پر خاوره، په ځانگړې توگه په دمشق او نورو ځایونو بريدونه په کلکو ټکو غندي او په وينا یې دغه ډول تجاوزونه نه یواځې د یوه خپلواک دولت د حاکمیت نقض دی، بلکې د ټولې سيمې د لا بېثباته کولو او هرج و مرج خپرولو سيستماتيک جنايت دی.
په خپره کړې اعلاميه کې د افغانستان سرپرست حکومت په سيمه کې پر اغېزناکو هېوادونو او سازمانونو غږ کړی چې د دغو تیریو پر وړاندې خپل مسؤلیت ادا کړي، د اسرائیلي رژیم دغه ډول تجاوزونه ژر تر ژره ودروي، او د سوریې د ولس او مشروع حکومت خپلواکۍ او ملي حاکمیت ته درناوی ولري.
ياده دې وي چې اسرائيلي رژيم نن له غرمې راهيسې د سوریې په ګڼو ښارونو او دولتي تاسيساتو پراخ هوايي بريدونه ترسره کړي او لا هم روان دي.