د امربالمعروف او نهې عن المنکر وزارت سرپرست وزير شیخ محمد خالد حنفي په يوه غونډه کې د ياد وزارت محتسبينو ته په وينا کې ويلي، چې اسلام د چا په شخصي حریم د تېري اجازه نه ورکوي او له محتسبینو یې غوښتي، چې د شخص له اجازې پرته یې د موبایل، جېب او کور له څارلو ډډه وکړي.
ښاغلي حنفي دې غونډه کې د امربالمعروف او نهې عن المنکر محتسبینو ته خلکو سره د ښه چلند سپارښتنه کړې او ورته ویلي یې دي، چې په خپلو کړنو او چال چلند کې د الله تعالی رضا او د ټولنې اصلاح خپلې اصلي موخې وګرځوي.
نوموړي وړاندې په خپلو خبرو کې رشوت اخیستل د خوګ غوښې تر خوړلو هم ستره ګناه ياده کړې او له ياد عمل څخه په کلکه ډډه کولو یې ټينګار کړی.
ښاغلي حنفي همدا راز د شریعت تطبیق د امربالمعروف او نهې عن المنکر اصلي دنده بللې.