وال سټريټ ژورنال راپور ورکړی، چې د امريکا ولسمشر ډونالډ ټرمپ چين ته له سفر وروسته د ايران پر وړاندې له سختو پرېکړو سره مخ دی او د جګړې د پای ته رسولو هڅه کوي، خو ایران بیا له اټومي امتیازاتو پرته هر ډول تړون ردوي او هغه یوه ماته ګڼي.
سرچينې ويلي، ایران د خپل اټومي پروګرام له محدودولو او د غني شویو یورانیمو له سپارلو ډډه کوي او په هرمز تنګي یې د کښتیو پر وړاندې هغسې تړلی ساتلی.
د وال سټريټ ژورنال په خبره که د امریکا په خوښه یو ښه تړون رامنځته نشي، امریکا ښايي د ایران پر اټومي او د تېلو پر تاسیساتو بریدونه وکړي، سمندري کلابندي جاري وساتي او اقتصادي فشارونه زیات کړي.
که څه هم پوځي اقدامات خطرونه لري، خو له پايلې پرته د مذاکراتو اوږدېدل د امریکا دفاعي ځواک کمزورې کوي.