د هندوکشغږ له خوا د تش په نوم متحدې جبهې د مشر سمیع سادات او لغمان د پخواني امنیه قوماندان الله داد فدايي ترمنځ تبادله شوي غږیز کلیپونه خپاره شوي دي؛ په دې غږیزو پیغامونو کې یو ځل بیا د افغانستان د بدنامو او تېښتېدلو څېرو اصلي او خائنانه څېره د ملت په وړاندې بربنډه شوه. دغه پیغامونو له هغو استخباراتي پروژو پرده پورته کړې، چې د پردیو په ملاتړ د افغانستان د ثبات په ضد پلان شوې وې او غوښتل یې په افغانستان کې د پوځي رژیم شومې موخې تحقق کړي.
په هغه غږیزو کلیپونو کې چې د هندوکشغږ له خوا خپاره شوي دي، دواړو لوریو د تش په نوم آزادۍ جبهې او د امرالله صالح په مشرۍ د زرغون بهیر په غړو تور پورې کړی چې د پيسو په بدل کې په تمثیلي او نمايشي توګه دوه ډزه کوي، ویډيو ترې کوي او نور تښتي؛ خو د دوی په وینا چې ملګري به یې داسې نه کوي، بلکې د خپلو وفادارو ملګرو په مرسته به رازونه ساتي او بنسټیز کارونه به مخ ته وړي. له دې ښکاري چې یو خو پخپله د مخالفینو په منځ کې د یو بل په وړاندې داخلي اختلافات او مخالف لیدلوري شته او بل دا چې سمیع سادات په ډېرې وفادارۍ دې استخباراتي مأموریت ته را دانګلي دي.
سمیع سادات په داسې حال کې چې مخکې یې په خپلو رسنیزو څرګندونو کې اوسنی افغان حکومت د پاکستان په ملاتړ تورناوه، په سپینو سترګو یې حتی د پوځي رژیم د ملاتړ غوښتنه لا ردول او ځان یې د دغه رژیم له ملاتړه خلاص باله، په غږیزو پیغامونو کې په خورا افتخار سره وايي، چې د کرښې هغې غاړې ته راغلی، هلته مېشت دی، مهمات یې ترلاسه کړي او د انتقال پر چارو یې بوخت دی. دغه څرګندونې د پوځي رژیم د غلامۍ څرګند ثبوت او د ټولو هغو مخالفینو پر تندي تور داغ دی، چې ځان د پردیو له نیابت پاک ګڼي، خو بېرته د اسلام آباد د پوځي استخباراتو د لاسپوڅو په توګه د ورانکارۍ او ناامنۍ د تحرکاتو رامنځته کولو او د پردیو اهدافو د پلي کولو لپاره کار کوي.
په داسې حال کې چې افغان ملت نن ورځ د سولې، ثبات او پرمختګ پر لاره روان دی، سمیع سادات او د ده په څېر تښتېدلې شریر عناصر هڅه کوي چې د نورستان او لغمان د غرنیو لارو په کارولو سره هېواد ته د داسې چا له لوري وسلې او تخریبي مواد راولېږدوي، چې هېڅکله یې د افغانستان د ثبات او پرمختګ پلوي نه ده کړې. د مخالفینو له خوا د ورانکارۍ هڅې د دې حتمي ثبوت دی چې دغه تښتېدلي مخالفین د افغانستان د ورانولو او عامو خلکو د وینې تویولو په بدل کې له بهرنیو بادارانو څخه امتیازات ترلاسه کوي.
افغان ځورېدلی ملت باید د دغو تښتېدلو، نمایشي او وطن پلورونکو کړیو د شومو دسیسو، خیانتونو او دوه مخيتوب پر وړاندې لا زیات ویښ او بیدار و اوسي. دا تش په نوم جبهې او په پردیو پورې تړلې حلقې په رسنیزو خیالي شعارونو کې د ملت د حقونو نارې وهي، مګر په پټه بیا د هماغه پاکستان په غېږ کې ناست دي چې کلونه کلونه یې د دې خاورې د تباهۍ او وینو تویولو لپاره کار کړی دی او د افغان ملت پر وړاندې یې تر ټولو لویه جفا همدغه ده چې د پردیو په تمویل د هېواد امنیت او ثبات سبوتاژ کوي.