یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د افغانستان له آزادۍ، امن، سولې او ورورولۍ سره د شر او فساد ډلو او نورو خاينانو خوبونه حرام شول؛ ځکه دوی نور نه شي کولای چې د تعصب له وسلې په کار اخيستلو د ولس په سر سودا وکړي، نور د ولس ګرېوان د دوی له ناولو لاسونو څخه و ژغورل شو.
دغه مفسدين بهر ته و تښتېدل، په ټولنيزو رسنيو کې يې د ا.ا مخالف نشرات پيل کړل؛ د مقاومت نعرې يې راشروع کړې خو د دوی دغه مقاومت يواځې تر ټولنيزو رسنيو پوري محدود شو.
دوی همېش د قومي او ژبني تعصب له وسلې کار اخيستی، خلک به يې د قوم، ژبې او منطقې په نامه را پارول او بيا به يې پرې خپل شوم اهداف عملي کول؛ د دوی وسله تعصب او په ولس کې تفرقه وه چې د ا.ا په راتګ سره يې دغه وسله له لاسه و وتله.
دوی چې په بهر کې سره راټول او د ا.ا مخالف يې د بغاوت غږونه پورته کړل، د وطن دوستۍ دروغجن شعارونه يې شروع کړل او غوښتل يې بيا قومونه په دغسي شعارونو وغولوي خو ولس ورسره ونه درېده او دوی يې يواځې پرېښودل.
د افغان ولس ټولو قومونو دغه مفسدين او شر و فساد جوړوونکي وپېژندل، ولس پوه شو چې د شر و فساد ډلې دوی استعمالول او اصل هدف د دې ډلې ډالر او د واک تنده ده؛ هغه که د اشغال موجوديت کې وي او يا هم د کورنۍ جګړې په جريان کې.
بل طرف ا.ا د ولس اتحاد ته کار ويلی، هر قوم په نظام کې ځای لري او برتري يې يواځې اسلاميت او تقواء پوري مربوط کړه؛ اوس په افغانستان کې پښتون پر تاجک، يا هم تاجک پر هزاره او… برتري نه لري، بلکې ټول يو مسلمان، يو افغان او يو ملت شو.
د ولس له اړخه د شر و فساد ډلې ته منفي ځواب د دې وجه شوه چې دغه بهر ته تښتېدلي خپلو کې سره يو پر بل لګونې او مخالفتونه شروع کړي؛ دوی په ميډيا کې يو پر بل تورونه پوري کوي، يو پر بل بې باوره او حتا بهر له افغانستان څخه څو تنه مشران يې لا هم نه سره جوړېږي خو دعوه يې د افغانستان د نيولو ده.
د دوی دغه خپلمنځي مخالفتونو ته په کتلو ترې نړيوالو جاسوسي سازمانونه هم ځان بغل ته کړی، ځکه هغوی پوهېږي چې دوی دلته بهر له وطن څخه خپلو کې سره په دغه حال کې دي نو افغان ولس به څه باور پرې وکړي او موږ به څنګه کار ترې واخلو چې په ولس کې نفوذ ونه لري.
امرالله صالح پر هزاره ورونو د ا.ا مخالف د وسلې پورته کولو غږ کړی وو خو د هزاره ورونو له طرفه ورته په منفي ځواب سره و ويل شول چې د هزاره وو نسل وژنه خو د افشارو له قتل عام څخه راشروع شوې او اوس يې هم هغوی وژني، مطلب يې دا وو چې همدا تاسو د شر و فساد ډلې(احمد شاه مسعود) له طرفه د هزاره وو نسل وژنه راشروع شوې وه.
هزاره ورونو و ويل چې موږ هيڅکله د ا.ا مقابل وسله نه پورته کوو، بلکې د ا.ا سره ښې اړيکې لرو او په دغه نظام خوشحاله يو؛ زياتوي چې موږ نه غواړو افغانستان بياځلي کورنۍ جګړې ته لاړ شي او بيا ځلي ستاسو(شر و فساد ډلې) له خوا قتل عام شو.
دا چې داعشي خوارج او د شر و فساد ډله يوه شوې او د شر و فساد په جامه کې يې ځانونه هم تر ايران، روسيې او نور د سيمې هېوادونو ته رسولی؛ همداسي د هزاره ورونو وژلو ته يې هم د شمالي ټلوالې په مرسته ځان رسولی؛ دا هزاره ورونو ته معلومه شوې ځکه خو وايي چې اوس هم زموږ نسل وژنه همغه د افشارو څخه تاسو راشروع کړې او اوس هم له همغه ادرس څخه وژل کېږو.
تازه د مسعود د وژل کېدو اوونۍ چې دوی يې د شهيد اوونۍ بولي او مخکې به يې په دغه ورځ افغانستان کې لنډغري کوله اوس په دغه ورځ بهر دغه د شر و فساد ډلې مشرانو آنلاين غونډه جوړه کړې وه چې هغه کې هم په جنجال سره اوښتي.
عبدالرشيد دوستم غواړي بهر له افغانستان څخه په تبعيد کې خپل دولت اعلان کړي، د جنبش ګوند وياند احسان نيرو د دې خبرې پخلی کړی چې دوی غواړي بهر له افغانستان څخه يو موازي دولت اعلان کړي.
د ټولو قوانينو خلاف چې يوه لوېشت ځمکه په افغانستان کې نه لري خو دغه ماشومانه حرکت د دې ډلې د فسبوکي مقاومت غوندي دی چې يواځې تر سوشل ميډيا پوري محدود پاتې شوی.
دوی به رب نور هم ذليله کوي، ځکه ولس و پېژندل او لاس يې ترې واخيست.
