د سفر او ګرځندوی نړیواله اداره (WTTC) وايي، چې د ایران، امریکا او اسرائیلو ترمنځ روان کړکېچ د منځني ختیځ د ګرځندوی سکټور ته هره ورځ شاوخوا ۶۰۰ میلیونه ډالر زیان اړوي.
دغې ادارې په یوه اعلامیه کې ویلي، چې د نړیوالو سیلانیانو د لګښتونو کمېدو، د هوايي سفرونو ګډوډۍ، د مسافرو د امنیتي اندېښنو زیاتېدو او د سیمې د ترانسپورتي اړیکو د ګډوډېدو له امله دا سکتور له جدي ستونزو او ننګونو سره مخ شوی دی.
د سرچينې د معلوماتو له مخې، منځنی ختیځ د نړۍ د ګرځندوی شاوخوا پنځه سلنه برخه جوړوي او نږدې ۱۴ سلنه نړیوال ټرانزیټي مسافر له همدې سیمې تېرېږي.
د ګرځندوی نړیواله اداره زیاتوي، چې په عادي شرایطو کې د دوبۍ، ابوظبۍ، دوحې او منامې هوايي ډګرونه هره ورځ شاوخوا ۵۲۶ زره مسافرو ته خدمات وړاندې کوي؛ خو په تېرو دوو اوونیو کې د دغو مهمو هوايي مرکزونو فعالیتونه له جدي ګډوډۍ او ګڼې ګوڼې سره مخ شوي دي.
د معلوماتو له مخې د ايران جګړې پر نړیوال هوايي چلند هم اغېز کړی او د نړۍ په یو شمېر هوايي لارو کې د ټکټونو بیې لوړې شوي او هوايي شرکتونو د محدود هوايي حریم او عملیاتي ستونزو له امله د خپلو پروګرامونو بدلون ته مخه کړې ده.
د یاد سازمان د اټکل له مخې، تمه کېده چې منځنی ختیځ به په ۲۰۲۶ کال کې د نړیوالو سیلانیانو له لګښتونو څخه شاوخوا ۲۰۷ میلیارده ډالر عاید ترلاسه کړي؛ خو روان کړکېچ پر دې اټکل فشار راوستی دی.