د ایران د بهرنیو چارو وزیر عباس عراقچي له رجا نیوز سره په مرکه کې ویلي، چې د هېواد د اټومي پروګرام په اړه به ایران په هېڅ قیمت معامله ونه کړي او د بهرنیو فشارونو پر وړاندې به تسلیم نه شي.
عراقچي ویلي، د هېواد برخلیک ټاکونکې پرېکړې، لکه د جګړې او سولې اړوند موضوعات، د ملي امنیت په عالي شورا کې د پوځي، اقتصادي او بهرنیو اړیکو د متخصصینو له لوري په دقیق ډول ارزول کېږي. د هغه په وینا، په مذاکراتو کې د ایران د برلاسۍ اصلي راز د ولس ملاتړ دی.
هغه زیاته کړې، د روانې جګړې پر مهال، سره له دې چې د بریدونو، چاودنو او د لوړپوړو چارواکو د وژل کېدو جدي ګواښونه موجود وو، د نظام مشرتابه او مسوولانو له خپلو دریځونو شاتګ ونه کړ.
عراقچي همدارنګه ادعا کړې، چې د امریکا د ولسمشر ډونالډ ټرمپ له څرګندونو سره سره، واشنګټن د پام وړ لاسته راوړنه نه ده ترلاسه کړې او ایران د خپلې وروستۍ جګړې له تجربو څخه په ګټې اخیستنې ستراتیژیکه بریا خپله کړې ده.
هغه ویلي، د نظام د کمزوري کولو او تجزیې ټولې هڅې ناکامې شوې او ایران نړۍ ته د پخوا په پرتله د یو پیاوړي هېواد په توګه ځان ور وپېژاند.