د افغانستان اسلامي امارت د بهرنيو چارو وزير مولوي اميرخان متقي په خپل کاري دفتر کې د ايران اسلامي جمهوریت د عدليې له وزارت له مرستیال ډاکتر عسکر جلاليان او ورسره مل پلاوي سره کتلي.
په دې کتنه کې د دوه اړخیزو اړیکو، په ایران کې د افغان کډوالو او بندیانو پر وضعیت، د اقتصادي او سوداګریزو همکاریو پر پراختیا او د سیمهییزو سیاسي تعاملاتو پر پیاوړتیا خبرې شوي دي.
د افغانستان اسلامي امارت د بهرنیو چارو وزیر مولوي امیرخان متقي په تېرو څلورو لسیزو کې د ایران له خوا د افغان کډوالو کوربهتوب ستایلی او له دغو کډوالو سره د ایران د حکومت د لا ښه تعامل او زغم غوښتنه کړې ده.
ښاغلي متقي همداراز د افغان بندیانو د رالېږدولو په برخه کې د ایران له اسلامي جمهوریت سره د همکارۍ په اړه د افغانستان د اسلامي امارت پر ژمنتیا ټینګار کړی او د ایران د عدلیې وزارت له مرستیال څخه یې غوښتي چې د افغان بندیانو د سپارلو په بهیر کې هر اړخیزه همکاري وکړي.
ډاکټر عسکر جلالیان افغانستان کې د ثبات له ټینګېدو او شویو پرمختګونو څخه د خوښۍ په څرګندولو سره، په افغانستان کې له بېلابېلو بنسټونو سره د مثبتو خبرو اترو په اړه هم معلومات ورکړي.
نوموړي د خپلو خبرو پر دوام ویلي چې په نږدې راتلونکي کې به د لاسلیک شوي توافقنامې پر بنسټ له ایران څخه د افغان بندیانو د لېږد عملي بهیر پیل کړي او له افغانستان سره به خپلې نږدې همکارۍ ته دوام ورکړي.
په دې کتنه کې د دوه اړخیزو سیاسي اړیکو د بیا کتنې ترڅنګ، په ایران کې د افغان مهاجرینو د ستونزو، د اقتصادي همکاریو پر پراختیا او یو شمیر نورو مسایلو په اړه خبرې شوي دي.