د کرنې، ابو لګولو او مالدارۍ وزارت په یوه خبرپاڼه کې ویلي، چې د ایران د اسلامي جمهوریت لوړپوړي پلاوي، چې مشري یې د دغه هېواد د کرنې وزیر غلام رضا نوري قزلجه کوله، په کابل کې یې د افغانستان د کرنیزو او مالدارۍ محصولاتو له نړۍوال نندارتون څخه لیدنه کړې ده.
ایراني پلاوي د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني په ملتیا د نندارتون له بېلابېلو غرفو لیدنه کړې، د افغانستان د کرنې، مالدارۍ او اړوند تولیدات یې کتلي او د تولیدونکو او خصوصي سکټور ظرفیتونه او د کرنې او مالدارۍ په برخو کې د پانګونې فرصتونه هم ور وپېژندل شوې دي.
خبرپاڼه زیاتوي، چې د ایران د کرنې وزیر هم د دواړو هېوادونو ترمنځ د کرنیزو همکاریو د پراختیا په اړه لېوالتیا څرګنده کړې ده.
دغه نندارتون د کورنیو تولیداتو د معرفۍ، بازار موندنې او په کرنیز او مالدارۍ سکټور کې د سوداګرۍ او پانګونې د پراختیا په موخه د کابل چمن حضوري د نړۍوالونو نندارتونونو په مرکز کې جوړ شوی دی.