د ایران د بهرنیو چارو وزارت ویاند اسماعیل بقایي وايي، د هرمزګان ولایت د سیریک ولسوالۍ په کوهستک ښار کې د واده پر مراسمو د امریکا په برید کې د یوه استوګنیز کور د لګېدو له امله لږ تر لږه ۴ کسان، چې یو ماشوم هم پکې شامل دی، وژل شوي او له ۵۰ ډېر نور ټپیان شوي دي.
د ایران سرې میاشتې هم د څلورو کسانو د وژل کېدو او له ۵۰ د ډېرو د ټپي کېدو خبر ورکړی دی.
بقایي دغه پېښه د ملکي وګړو پر وړاندې د امریکا د بریدونو د لړۍ یوه برخه بللې او ویلي یې دي، چې په میناب، لامرد او قشم کې هم ورته بریدونه شوي دي.
د ایران د بهرنیو چارو وزارت ویاند خبرداری ورکړی، چې تهران به د دغو بریدونو پر وړاندې «کلک او قاطع» ځواب ورکړي او هغه هېوادونه چې پر ملکي وګړو د بریدونو پر وړاندې چوپ پاتې کېږي، باید د راتلونکو پایلو مسوولیت هم ومني.