لیکوال: نوین ساپی
دا چې دوی وایي، د ملګرو ملتونو د بشري حقونو شورا په یو شمېر هيوادونو كې د بشري حقونو د حمايت په موخه ايجاد شوې، دا خبره خو یې هېڅ حیقیت نه لري، هسې دنیا ته رنګ ورکوي، ټول فعالیتونه یې د بشر خلاف روان دي.
ټول هغه هيوادونه چې د ملل متحد عضويت لري، په دې مكلف دي، چې د بشري حقونو په نوم افكار او فرامين ومني او وروسته يې په خپلو ملكونو كې تطبيق كړي، غرب او امريكا خپل افكار د ملل متحد تر چتر لاندې كوښښ كوي، چې اول یې په هيوادونو باندې ومني او وروسته له فرصت څخه په استفادې په هغه هيواد باندي د فشارونو په ذريعه تطبيق كړي.
غرب خپله د بشر حقونه نه پېژني بشر وژنه کوي، عمده بېلګې یې عراق، سوریه، لېبیا، اوکراین او په فلسطین کې ظلمونه او وحشتونه دي چې په زرګونو انسانان یې ووژل او لا یې وژني.
په مسجدونو بمباري، په روغتونونو بمباري او همدې ته ورته په نورو عامه ځایونو بمباري، په لسګونو تنه په ډلیزو قبرونو کې خښول، همدا د بشر حقونه دي چې دوی یې تر سره کوي؟ که دا د دنیا پر مخ بل بشر دی چې دوی یې وژني؟ دوی دې د دې پوښتنې جواب ووایي، که دا په بشر کې نه راځي؟ یوازې د بشر حقونه په افغانستان کې تر پښو لاندې شوي؟
د بشري حقونو د شورا موخه که چېرته غربي افکار په افغانانو منل غواړي، همجنس ګرایي دې ازاده وي، فحشا او بې حیايي دې وي، د دین او قران خلاف کړنې دې تر سره شي، لوڅې او بربنډې انجونې دې په میله ځایونو او په ځانګړو مجالسو کې د نېشې په حالت کې نڅاګانې وکړي؛ دا ډول بشري حقونه افغانان نه غواړي او نه یې د حمایت محتاج دي.
پورته چې د کومو موضوعاتو یادونه وشوه، همدا د غربيانو افكار او ارزښتونه دي، نو اكثره اسلامي هيوادونه دغو حقونو ته عقيده نه لري او كوښښ كوي چې، خپل هيواد ترې لرې وساتي، برعکس یو شمېر مستعمره اسلامي هيوادونه د غرب د فشارونو په نتيجه كې دغه قوانين منلي او تطبيق كړي دي لكه: پاکستان چې تل د بشري حقونو په نامه د غرب لخوا د استعمار او بندیزونو لاندې راغلی ده.
الحمدلله اوس مهال افغانستان کې، یو اسلامي او شرعي نظام حاکم دی، د هر فرد نارینه او ښځینه حقوق پکې خوندي دي.
د اسلامي امارت په څه کمه درې کلنه موده کې افغانانو خپل حقوق وپېژندل، او ترلاسه یې کړل؛ د کومو حقونو چې دوی یادونه کوي، هېڅ افغان د هغو حقونو غوښتونکی/خواهشمند نه دی.
غرب دې لومړی له هر څه وړاندې بشر وپېژني، بیا دې د بشر حقونه وړاندې کړي، ځکه چې اوس خو د دوی په خوله کې چې کوم د بشر حقوق دي، هغو بشري حقونو په نړۍواله كچه خپل حيثيت له لاسه وركړى دى.