شمسالدین مشهور په «شمس خرابات»، د غلام محيالدین زوی او د غایب نظر لمسی، د بغلان د نهرین ولسوالۍ او شاوخوا سیمو کې د یوې وسلهوالې ډلې له پېژندل شوو قوماندانانو څخه و، چې د وژنو، وسلهوالو غلاوو، انسان تښتونې او باج اخیستنې په ګڼو قضیو کې ښکېل و.
د سیمې د اوسېدونکو په وینا، شمس خرابات د خلکو پر وړاندې د زورزیاتي او باج اخیستنې ترڅنګ، د پیسو ترلاسه کولو لپاره د انسان تښتونې په پېښو کې هم لاس درلود.
د دغو قضیو له جملې یوه یې د نهرین ولسوالۍ له یوې مشهورې قابلې سره تړاو لري. د معلوماتو له مخې، نوموړې قابله او د هغې انږور د پیسو لپاره تښتول شوې وې او وروسته یې د خوشې کېدو په بدل کې له کورنۍ ۸۰۰ زره افغانۍ غوښتل شوې او ترې اخیستې یې دي.
همداراز، د نهرین ولسوالۍ د دشت قاضي سیمې اوسېدونکی ډاکټر جهانګیر هم د شمس خرابات له لوري د باج اخیستنې له پېښو څخه یو یاد شوی. د ترلاسه شویو معلوماتو له مخې، له نوموړي څخه د باج په توګه ۳۰۰ زره افغانۍ اخیستل شوې دي.
د سیمې د معلوماتو له مخې، شمس خرابات د نارینه ډاکټرانو د کار د مخنیوي او له روغتیايي کارکوونکو څخه د پیسو اخیستلو په برخه کې هم پر خلکو فشار راوړی و.
شمس خرابات وړمه شپه د بغلان د نهرین ولسوالۍ د کهګدای په سیمه کې د افغان ځانګړو ځواکونو په هدفي عملیاتو کې له یوه بل وسلهوال قوماندان، قدیر مشهور په «بابه»، سره یوځای ووژل شو.
د نوموړي له وژل کېدو سره په سیمه کې د هغه وسلهوال فعالیت پای ته رسېدلی، خو د سیمې اوسېدونکي وايي، د هغه د دورې د وژنو، اختطافونو او باج اخیستنې پېښې به د متضررو کورنیو په یاد کې پاتې وي.