د بهرنيو چارو وزارت درېيم سياسي رييس ذاکر جلالي وايي، دوحه کې د افغانستان او پاکستان ترمنځ د نښتو پر درېدو هوکړه د هرکلي وړ پرمختګ دی او په خبره یې له پیله د افغانستان اصولي دریځ پر خبرو او تفاهم ټینګار و، چې دوحه کې د منځګړو په شتون کې هم پرې تاکید وشو.
د ښاغلي جلالي په خبره له لویه سره افغانستان د بل هېواد د حریم ناقض نه و، بلکې پاکستان پوځي رژیم د افغانستان هوايي حریم نقض کړی و، چې همدا د نښتو اصلي لامل و.
نوموړی زياتوي، هغه څه چې د تفاهم له محتوا څخه تر اوسه خپاره شوي، د قطر او ترکیې په شتون کې ښيي چې زموږ مرکچي پلاوي ډیپلوماتیکه بریا هم خپله کړې ده.
هغه ويلي، ټول بايد ډاډه واوسو، چې د ملي دفاع وزير په مشرۍ مرکچي پلاوي د میدان په څېر د ډیپلوماسۍ پر مېز هم د افغانستان د اصولي او تاريخي دريځ ټينګه دفاع کړې او د کلمو په کارونه کې بشپړ دقت شوی، تر څو څوک ترې بله يا د افغانستان له اصولي دريځ څخه په ټکر معنا وانه خلي.