د جمهوریت پر مهال د بلخ والي او اوس مهال د تش په نوم مقاومت شورا د رهبرۍ غړي عطاء محمد نور د نورستان پېښې ته په اشاره، پر خپله اېکس پاڼه د شر او فساد ډلو له مشرانو غوښتي چې د بهرنیانو د خوښۍ او شهرت لپاره خپل ځوانان د نیابتي جګړو قرباني نه کړي.
هغه ويلي «د نورو د خوښۍ لپاره ځوانان د مرګ خولې ته مه ورکوئ.»
نور زیاتوي، چې د افغانستان د تېرو ۴۵ کلونو د جګړو تجربه ښيي چې د هېواد پر بدلون بايد د بهرنیو قدرتونو د «نیابتي ځواک او پیادهنظام» پر مټ ترسره نه شي.
نوموړي ټینګار کړی، چې افغان ځوانان باید د بهرنیو قدرتونو د نیابتي جګړو قرباني نه شي او د افغانستان د راتلونکې په اړه باید د افغانانو خپلواک اقدام اصل وګرځول شي.