د پښتون ژغورنې غورځنګ په ابتکار د پښتونخوا خیبر ولسوالۍ کې د پښتنو لویه جرګه راغوښتل شوې ده.سره له دې چې د پاکستان حکومت یې سخت مخالفت کړی او د مخې نیولو ټولې هڅې کوي، خو غورځنګ هم په شدت سره د جرګې د ترسره کېدو هلې ځلې روانې کړي او له ټولو پښتنو یې د ګډون غوښتنه کړې ده.
د غورځنګ مشر منظور پښتون ویلي چې هر ډول وي سبا به جرګه دایروي؛ جرګه د پښتنو د کلتور مهمه برخه ده او پرېکړې یې مهم رول لوبوي.
که سبا جرګه کېږي، ممکن د پاکستان د ریاست پر ضد هغومره سختې پرېکړې و نه کړي لکه څه ډول چې اکثریت خلک تمه لري؛ په ځانګړي ډول له کرښې دېخوا پښتانه له جرګې ډېرې لویې تمې لري او ان له جرګې د یو خپلواک دولت د اعلان هیله هم ساتي.
خو د ملتپالو او نورو پښتنو ګوندو تېر ته په کتلو نه ښکاري چې جرګه به هغسې لویې پرېکړې وکړي چې د پښتنو په برخلیک کې به لوی بدلون راولي.
غورځنګ له پیله تل دا ادعا کړې چې مبارزه او غوښتنې یې د پاکستان د قانون په چوکاټ کې دي او ممکنه ده چې جرګه به هم د قانون په چوکاټ کې پرېکړې وکړي.
د ورکو پښتنو موندل او محاکمه کول، طبیعي زېرمو کې د هغې سیمې خلکو ته لومړیتوب ورکول، ممکن له ځینو سیمو د پوځ ایستل او د قانون په چوکاټ کې د پښتنو د نورو حقونو غوښتنه ښایي د جرګې مهمې پرېکړي وي.
دا هغه غوښتنې دي چې غورځنګ او د پښتنو نورو سیاسي ګوندونو یې په یوازې ځان له ډېر پخوا څخه غوښتنه کړې ده، خو که جرګه کېږي او دا غوښتنې مطرح کېږي، نو دا به لومړی ځل وي چې د پښتنو ټول ګوندونه او سیاسي او غیر سیاسي ډلې په ګډه له پاکستاني ریاست څخه خپل حقوق غواړي.
له جرګې د خپلواکۍ د اعلان او له پاکستان څخه د بېلتون او پر ضد یې د وسلې راخیستلو هیڅ تمه نه شي کېدای، ځکه غورځنګ او نور پښتانه پوهېږي چې دا وخت د دوی د وسله والې مبارزې له پاره جوړ نه دی او نه کولی شي چې د وسله والې مبارزې له لارې هغه موخې ترلاسه کړي د کومو موخو له پاره چې دوی د قانون په چوکاټ کې مبارزه کوي.