وروسته له هغه چې د هندوکش غږ موندنو وښودله چې د زاويه نيوز په نوم له بهره چلېدونکی يو استخباراتي او پروژهيي رسنیز ادرس چې ځان ته د رسنۍ خطاب کوي، کندهار کې د يوه ځوان د ځان وژنې په اړه دروغ راپور نشر کړی و او هغه ځوان ژوندی و، اوس تازه دې دروغجن ادرس د خپل تللي حيثيت د ساتلو لپاره خپل پوسټ حذف کړ.
د زاويه نيوز په نوم رسنیز ادرس چې له جوړښت تر ننه د تبلیغاتو، تعصب ته په لمن وهلو او ناسمو معلوماتو په خپرولو مشهور دی په دې وروستيو کې یې هېواد کې د ځان وژنو د پېښو په اړه ګڼ شمېر راپورونه دروغ شوي او نږدې ټولو څارونکو یې په تبصرو کې د دوی د دروغو نشراتو ته توند غبرګون ښودلی.
که څه هم هېواد کې د ځان وژنې پېښې وخت ناوخت ترسره کېږي؛ خو مغرض ادرسونه او تبليغاتي سازمانونه ډېری وخت له ورته موضوعاتو د خپلو شومو اهدافو لپاره استفاده کوي او ناکامه هڅه کوي چې په دې سره د هېوادوالو رواني ثبات او وضعیت تر تاثير لاندې راولي.