د دفاع وزارت وایي، چې بېلابېلو قطعاتو او جزوتامونو ۷۵ منسوبین د ستر درستیز د مخابرې او معلوماتي ټکنالوژۍ ریاست له دوه میاشتني مسلکي مخابرې کورس څخه فارغ شول.
د فراغت په دې مراسمو کې د وسله وال پوځ د لوی درستیز مرستیال حاجي مالي خان صدیق فارغانو ته د وینا پر مهال ویلي، چې دوی د اسلامي نظام د ټینګښت او ساتنې مهم مسوولیت پر غاړه لري او باید خپلې دندې د صداقت، تعهد او پوره احساس له مخې ترسره کړي.
هغه ټینګار کړی، چې د منسوبینو مورال او روحیه باید د هر ډول شرایطو پر وړاندې قوي او استواره پاتې شي او په خپلو مسلکي برخو کې د مهارتونو لوړولو ته دوام ورکړي.