محمد فیصل
وړمه ورځ د قطر پلازمېنې دوحه کې د دوحې نړیوال بحري دفاعي نندارتون او کنفرانس پېل شو، دغه نندراتون د قطر د وسله وال پوځ له لوري جوړ شوی چې درې ورځې دوام کوي.
یاد نندارتون کې د امریکا، ترکیې، ایران او اذربایجان په ګډون د شپیتو هېوادونو چارواکي ګډون کوي.
دغه نندارتون ته د افغانستان د ملي دفاع سرپرست وزیر مولوي محمد یعقوب مجاهد او د وسله وال پوځ لوی درستیز قاري فصیح الدین فطرت ته بلل شوي دي.
سره له دې چې افغانستان بحري پوځ او تجهیزات نه لري، خو دغه ډول نړیوالو دفاعي نندارتونو ته د افغان دفاع وزیر تګ له افغان حکومت سره د نړۍ د تعامل او اړیکو څرګند پیغام ورکوي.
دا ډیره مهمه ده چې افغان چارواکي دغه ډول ناستو کې ګډون کوي او نړۍ هم پوهیږي چې افغان حکومت سره له تعامل پرته بله لار نشته او یوازینی ادرس هم دغه دی.
قطر کې د اسلامي امارت د سیاسي دفتر مشر سهیل شاهین عرب نیوز ته ویلي، دا نندارتون او کنفرانس د افغان حکومت له پاره مهم دی، په ځانګړي ډول له نړیوالې ټولنې سره د تعامل له پاره مهم دی.
بله مهمه خبره چې دلته څرګندیږي دا ده چې د اقتصادي او سیاسي اړیکو او همکاریو تر څنګ د افغان حکومت پوځي اړیکې او همکاري هم د پراخېدو په حال کې دي.
تمه ده چې افغان چارواکي به له دغه نندراتون څخه په دفاعي او دیپلوماتیکه برخه کې ګټه ترلاسه کړي.