له ارګ څخه په خپره شوې خبرپاڼه کې ویل شوي، چې د ریاستالوزراء اقتصادي مرستیال ملا عبدالغني برادر د روسیې د لومړي وزیر له مرستیال الکسي اوورچوک سره په کتنه کې روسي شرکتونه په افغانستان کې د کانونو استخراج، صنعتي فابریکو، صنعتي پارکونو، ځانګړو اقتصادي زونونو او سوداګریزو زېربناوو جوړولو او پراختیا کې پانګونې ته بللي دي.
ملا برادر ویلي، په افغانستان کې د ګډو صنعتي پانګونو، له نړیوالو معیارونو سره سم د صنعتي پارکونو، ګډو ځانګړو اقتصادي زونونو او وچو بندرونو د جوړولو او فعالولو په برخو کې د روسي پانګوالو لپاره ښه فرصتونه شته.
نوموړي زیاته کړې، چې روسیې ته د جلغوزیو، انځرو، زعفرانو، انګورو، انارو او پنبې په ګډون د افغان کرنیزو محصولاتو د صادراتو د پراختیا ترڅنګ، د کرنې او مالدارۍ په برخو کې هم د روسیې پانګونې ته زمینه برابره ده.
د ریاستالوزراء اقتصادي مرستیال ټینګار کړی، چې افغان حکومت غواړي د سوداګریزو اسانتیاوو او ګډو پانګونو په پراختیا سره د دواړو هېوادونو ترمنځ د سوداګرۍ کلنی حجم د هغوی له اقتصادي ظرفیتونو سره سم تر ممکنه لوړې کچې ورسوي.