د روسيې د بهرنيو چارو وزیر سرګي لاوروف د فبرورۍ په ۲۴ مه نېټه له ترکيې څخه د لېدنې پر مهال ويلي، چې هېواد يې غواړي له اوکراين او اروپا سره مذاکرات وکړي، خو پوځي عمليات به يوازې په داسې حال کې پای ته ورسوي، چې روسيه د مذاکراتو له پايلې څخه راضي وي.
نوموړي همدا راز ويلي، چې د روسيې دريځ هېڅکله نه دی بدل شوی، خو د اوکراين او اروپا دريځونه پرله پسې بدلېږي.
لاوروف همدا راز ټينګار کړی چې په ناټو کې د اوکراين نه شاملېدل په خبرو کې د روسيې د ګډون اصلي او له ټولو مخکينی شرط دی.
د نوموړي په وینا روسي لوري په تېره اوونۍ کې د سعودي عربستان په پلازمېنه رياض کې له امريکايي لوري سره په بېلابېلو برخو کې د خپلمنځي خبرو د بيا پيل په اړه هوکړه کړې ده.