له ارګ څخه په خپره شوې خبرپاڼه کې راغلي، چې د ریاست الوزراء اداري مرستیال مولوي عبدالسلام حنفي په اسلامکلا کې د راستنېدونکو کډوالو د هرکلي او خدمتونو مرکزونه کتلي او د هغوی د ستونزو او اړتیاوو د حل بهیر یې ارزاولی.
مولوي عبدالسلام حنفي پرون د ښار جوړولو او مسکن وزیر مولوي نجیبالله حیات حقاني او یو شمېر لوړپوړو مسوولینو په ملتیا اسلامکلا ته تللی و او د راستنېدونکو کډوالو لپاره جوړ شوي تاسیسات یې له نږدې کتلي.
نوموړي د کډوالو د وضعیت، د بېلابېلو کمېټو د فعالیتونو، شته امکاناتو، د خدمتونو د وړاندې کولو او د ستونزو د حل بهیر ارزاولی او د مسوولینو ترمنځ یې پر لا زیاتې همغږۍ ټینګار کړی.
خبرپاڼه کې راځي، چې حنفي ټینګار کړی، چې راستنېدونکو کډوالو ته باید د راتګ، خدمتونو او لېږد په ټولو پړاوونو کې پر وخت، منظم او مناسب خدمات وړاندې شي او د هغوی اړتیاوو ته پر وخت رسېدنه وشي.
هغه زیاته کړې، چې زیانمنو کسانو، کورنیو، ماشومانو او نورو اړمنو راستنېدونکو ته دې ځانګړې پاملرنه وشي او د خدمتونو د وړاندې کولو بهیر دې لا چټک شي.