د ریاستالوزراء اقتصادي مرستیال ملا عبدالغني برادر نن پنجشنبه (د غویي، ۲۵مه) د کازان ۱۶م نړیوال اقتصادي فورم په پرانیستغونډه کې له ګډون وروسته د دغه فورم په څنډه کې د تاتارستان له ولسمشر رستم مینیخانوف سره کتلي.
د ریاست الوزراء اقتصادي مرستیالۍ د یوې خبرپاڼې په خپرولو سره ویلي، چې د لیدنې پر مهال دواړو لورو پر دوه اړخیزو اقتصادي او سوداګریزو اړیکو او همداراز په افغانستان کې د تاتارستاني پانګوالو پر پانګونې خبرې وکړې.
ښاغلي برادر د خپلو خبرو پر مهال ویلي، چې د سرپرست حکومت بهرنی سیاست خپلواک، مثبت، بې طرفه، متوازن او اقتصاد محوره دی او د نړۍ له ټولو هېوادونو سره ښې اړیکې غواړي.
نوموړي زیاته کړې ده چې، د همدې سیاست پر اساس غواړي چې له تاتارستان جمهوریت سره په افغانستان کې د پانګونې فرصتونو په ځانګړي ډول د انرژۍ، زېربناوو او دوه اړخیزې سوداګرۍ د پراختیا په برخه کې اړیکې پراخه کړي.
ښاغلي برادر د خبرو پر دوام، د افغانستان حالت او شرایط د پانګونې لپاره مناسب بللي او له تاتارستاني پانګوالو یې غوښتي څو په افغانستان کې د نفت او ګاز د استخراج او تصفیې، ساختماني پروژو، ریل پټلۍ او نورو برخو کې پانګونه وکړي.
له بله پلوه د تاتارستان ولسمشر رستم مینیخانوف په کازان ۱۶م نړیوال اقتصادي فورم کې د سرپرست حکومت د لوړ پوړي پلاوي ګډون مهم بللی او ویلي یې دي چې، له افغانستان سره په مختلفو برخو کې د اړیکو پراخولو په موخه به تاتارستاني پلاوي کابل ته واستوي.
نوموړي زیاته کړې، چې اوسمهال له افغانستان سره په یو شمېر برخو کې راکړه ورکړه لري؛ خو له دې وروسته چمتو دي چې د راکړې ورکړې کچه زیاته کړي.
د ریاست الوزراء د اقتصادي مرستیالۍ د خبرپاڼې پر دوام راغلي، چې په دې کتنه کې د کاماز موټرو شرکت عمومي رئیس ویلي، تاتارستان چمتو دی چې افغانستان ته د بار وړونکو کاماز موټرو او اطفایو صادرات زیات کړي او په دې برخه کې به د افغانستان لپاره له ولسمشر مینیخانوف څخه ځانګړې سب سایډي هم واخلي.
د کتنې په پای کې د ریاستالوزراء اقتصادي مرستیال د تاتارستان ولسمشر رستم مینیخانیوف ته بلنه ورکړې، څو افغانستان ته د دوه اړخیزو اړیکو د پراختیا په موخه سفر وکړي.