د عامې روغتیا وزارت په یوه خپرپاڼه کې یې ویلي، چې د یاد وزارت وزیر، مولوي نور جلال جلالي، زابل ولایت ته د خپل سفر پر مهال د شملزو ولسوالۍ کې د ۴۸ میلیونه افغانیو په لګښت د عمومي روغتون د ودانۍ د جوړېدو بنسټ ډبره کېښوده او چارې یې پیل شوې.
مولوي نور جلال جلالي د مراسمو پر مهال قراردادي شرکت ته سپارښتنه کړې، چې د روغتون د جوړولو په ټولو پړاوونو کې د ودانیزو چارو کیفیت او مسلکي معیارونه په پام کې ونیسي او پروژه د قرارداد له شرایطو سره سم، په ټاکلي وخت بشپړه کړي.
د عامې روغتیا وزارت د معلوماتو له مخې، د شملزو ولسوالۍ د عمومي روغتون د جوړولو چارې به په ۱۸ میاشتو کې بشپړې شي.