د ریاست الوزراء د اقتصادي معاونیت د دفتر رئيس عبدالله عزام د زاویه نيوز په نوم د يوه فسبوکي ادرس چې ځانته د رسنۍ خطاب کوي هغه ادعاوې په کلکه رد کړې، چې ګواکې د افغان ټیلي کام شرکت د تېلو په قرارداد کې فساد شوی دی.
ښاغلي عزام په همدې تړاو په يوه خپاره کړي وضاحت کې ویلي چې د افغان ټیلي کام شرکت د تېلو قرارداد څو ځله اعلان ته سپارل شوی و، خو لومړیو داوطلبیو کې څوک نه وو حاضر شوي او وروستي ځل یې یواځې څلور شرکتونو وړاندیز کړی و، چې د ګډون کوونکو شرکتونو قیمتونه د قرارداد د شرایطو او وړتیاوو مطابق نه وو او د مذاکرې وروسته یې هم د پام وړ تخفیف ورنه کړ.
په وضاحت کې همدا راز راغلي چې د «سن سکای ګلوبل» په نوم يو شرکت حاضر شوی و، چې د هر لیټر تېلو بیه په ۲۵ افغانۍ عرضه کړي، چې له مخې به د بیت المال ۴۲ میلیونه افغانۍ سپما شي او تېل به هم د افغان ټيلي کام شرکت ته پر وخت ورسېږي.
ښاغلي عزام دغه راز د معترضو شرکتونو د عريضې د نه اخيستلو په اړه څرګنده کړې چې د شکایتونو د ثبت قانوني مرجع د چارو ادارې لوی ریاست او د تدارکاتو رياست دی او که څه هم د اصولو له مخې د یادو شرکتونو د عریضې منل نه و، پکار خو په خبره یې بیا یې هم د هغوی شکایت ثبت او اړونده مرجع ته استولی دی.
نوموړي ټینګار کړی، چې په دغه پروسه کې ټول قانوني ګامونه تعقیب شوي او هېڅ ډول غیرقانوني اقدام او فساد نه دی شوی.