د سترې محکمې قاضي القضات، شيخ عبدالحکیم حقاني کابل پوهنتون کې د مشرتابه د فرمانونو په اړه جوړ شوي څيړنيز کنفرانس ته په خبرو کې ويلي، چې افغان ملت له ۵۰ کلونو وروسته د يو امير تر قيادت لاندې راغلی.
د ښاغلي حقاني په وينا، دا نظام د الله تعالی په نصرت حاکم شوی او د کومې شورا، سازمان یا بلې ادارې په توصیه او فرمایش نه دی حاکم شوی.
هغه ټينګار کړی، چې د نظام په چارو کې د هیچا مداخله نه منل کېږي او نه یې هم مداخله شته.
نوموړي زياته کړې، چې اختلافات د مسلمانانو قوت کمزوری کوي، باید ډډه ترې وشي او د خپلو مشرانو اطاعت ته غاړه کېښودل شي.
ښاغلي حقاني، اوسنی نظام د الله تعالی له لوري پر افغانانو يوه پېرزوينه بللې او په خبره یې چې اوسني نظام افغانان د اشغال له ټولو ستونزو خلاص کړل او داسې «فتحه» یې ور نصیب کړه چې د پرځول شوي جمهوريت هېڅ لاس او برخه په کې نشته.


