الجزیرې راپور ورکړی، چې د امریکا د ملي امنیت شورا پخواني چارواکي سټیفن سایمون ویلي، واشنګټن د منځني ختیځ هېوادونو کې د حکومتونو د نسکورولو لپاره پوځي ځواک کارولی، خو د جګړو له پای وروسته یې د سیاسي ثبات او امنیت په ټینګښت کې سترې ناکامۍ تجربه کړې دي.
د راپور له مخې، سایمون په خپل کتاب کې د عراق، لیبیا او سوریې تجربو ته په اشارې ویلي، چې د امریکا مشرانو د جګړو تر پیل مخکې د احتمالي پایلو په اړه خبرداریو ته پام نه دی کړی.
په عراق کې د پوځ منحل کول او له دولتي ادارو د بعث ګوند د غړو ایستل د ادارې د کمزوري کېدو او وسلهوال مقاومت د پراخېدو لامل شول، په لیبیا کې هم د معمر قذافي له نسکورېدو وروسته سیاسي ګډوډي او بېثباتي رامنځته شوه.
نوموړي د براون پوهنتون د ۲۰۲۱ کال د راپور له مخې ویلي، د ۲۰۰۱ کال د سپټمبر د ۱۱مې له بریدونو وروسته د امریکا جګړو شاوخوا اته ټریلیونه ډالر لګښت درلود او تر ۹۰۰ زرو ډېر کسان پکې وژل شوي دي.
د سایمون په باور، د امریکا یوه اساسي تېروتنه دا وه چې پر خپل پوځي برلاسي یې د هېوادونو د سیاسي راتلونکي د کنټرول وړتیا وګڼله، خو د سیمې د ټولنیزو او سیاسي واقعیتونو په درک کې پاتې راغله.


